Qurlyqtyq hokkei ligasynyń kezekti týrynda «Barys» elordada «Avtomobilist» (Ekaterinbýrg) komandasymen aidynǵa shyqty, dep habarlaidy QazAqparat.
Shyǵys konferentsiiada «Barys» pen «Avtomobilist» sáikesinshe segizinshi, toǵyzynda orynda edi. Sondyqtan úzdik segizdikke iligý úshin bul matchtyń mańyzy zor bolatyn.
«Barystyń» mergen shabýylshylary Nikita Mihailis pen Kertis Volk osyǵan deiin tórt oiyn boiy gol soǵa almasa, bul joly qanjyǵalary mailandy. 4-minýtta N.Mihailis Kertis Volk pen Egor Shalapovtyń pasynan keiin esep ashty. Kóp uzamai aidynnan qýylǵan Dmitrii Gýrkovtyń shyǵýyna bir sekýnd qalǵanda, qonaqtardan Stefan Da Kosta san basymdylyǵyn paidalanyp ketti – 1:1. Degenmen Iakob Lilia men N.Mihailis uiymdastyrǵan ádemi shabýyldan soń K.Volk esepti 2:1-ge jetkizdi.
Ekinshi kezeńde aidyn ieleri úsh márte san basymdylyǵyn paidalana almady. Kerisinshe sondai sátte Anatolii Golyshev tarazy basyn teńestirip ketti – 2:2.
Úshinshi kezeńde de, overtaimda da osy esep ózgermegennen keiin kezdesý taǵdyry býllit seriiasynda sheshildi. Munda Iakob Lilia men Linden Vei qaqpany dál kózdedi.
Match barysynda elordalyqtardyń qaqpashysy Ioni Ortio kóptegen soqqyny qaitara aldy.
Osylaisha «Barys» mańyzdy eki upaiǵa ie bolyp, segizinshi oryndy saqtap qaldy.
Iýrii Mihailistiń shákirtteri biylǵy jyldyń eń sońǵy oiynyn 29 jeltoqsan kúni elordada Shyǵys konferentsiiasynda úshinshi orynda kele jatqan «Salavat Iýlaev» (Ýfa) komandasymen ótkizedi.
