Korei halyq demokratiialyq respýblikasynyń (KHDR) basshysy Kim Chen Yn óz eli qýatty soqqy áleýetin damytýdy jalǵastyratynyn málimdedi. Bul týraly dúisenbi kúni TsTAK agenttigi habarlady, dep jazady QazAqparat.
TsTAK málimeti boiynsha, Kim Chen Yn bul málimdemeni «Hvason-17» kontinentaralyq jańa ballistikalyq zymyranyn sátti synaýǵa úles qosqan áskeriler jáne ǵalymdarmen kezdesý barysynda jasady. Habarlamada aitylǵandai, Kim Chen Yn KHDR «eldiń qorǵanys qabiletin nyǵaitýdy jáne Korei halyq armiiasynyń qarýlanýyna múmkindik beretin kúshti shabýyl qarýyn qurýdy kózdeitin óz maqsatyna jetýdi jalǵastyrady» dep atap ótti.
26 naýryzda Soltústik Koreianyń ortalyq «Nodon sinmýn» gazetiniń jazýynsha, 24 naýryzda KHDR-diń «Hvason-17» qurlyqaralyq ballistikalyq zymyranyn synaqtan ótkizýi el úkimeti men halqynyń «úlken jeńisine» ainalǵan.
TsTAK agenttigi 25 Naýryzda KHDR Kim Chen Ynnyń tikelei buiryǵymen «Hvason-17»-ni synaqtan ótkizgenin rastady.
Soltústik Koreia tarapynyń málimetinshe, zymyran shamamen 1090 shaqyrymǵa ushty, al maksimaldy ushý biiktigi 6248 shaqyrymdy qurady. Qurlyqaralyq ballistikalyq zymyran 68 minýt aýada boldy, sodan keiin ol Japon teńizindegi shartty nysanaǵa tidi. Japoniia Qorǵanys ministrliginiń málimetinshe, zymyran eldiń airyqsha ekonomikalyq aimaǵyna (Osima túbeginen batysqa qarai 150 shaqyrym) tústi.
