Qazaqstan halqy Assambliasynyń atynan beriletin nagradalar tizimine birqatar ózgeris engizildi, dep habarlaidy "Ult aqparat".
Bul týraly QHA Tóraǵasynyń orynbasary Maia Bekbaeva Assambleianyń keńeitilgen otyrysynda málim etti. Onyń aitýynsha, búginde Qazaqstan halqy Assambleiasynyń tórt qoǵamdyq marapaty bar. Olar:
1) «Qazaqstan halqy Assambleiasynyń qoǵamdyq «Birlik» altyn medali»;
2) «Jomart jan» tósbelgisi»;
3) qurmet gramotasy;
4) alǵys hat.
«Qazaqstan halqy Assambleiasy Keńesi músheleriniń qaraýyna qoǵamdyq nagradalar týraly ereje jobasy men qoǵamdyq nagradalar dizainy usynylyp otyr. Birinshiden, Qazaqstan halqy Assambleiasynyń «Birlik» qoǵamdyq medali ózgerissiz qalady. Ol 10 jyldan astam ýaqyt boiy berilip, qoǵamda úlken bedelge jáne tanymaldyqqa ie boldy», - degen Assambleia ókili bul medal halyqtyń birligin nyǵaitýǵa, beibitshilik pen kelisimdi saqtaýǵa jáne rýhani mádenietti damytýǵa qosqan eleýli úlesi úshin beriletindigin eske saldy.
«Ekinshiden, bedel men áleýmettik mańyzdylyǵyn arttyrý úshin «Jomart jan» tósbelgisiniń dizainyn ózgertý usynylady.
Qazaqstan halqy Assambleiasynyń «Jomart jan» tósbelgisi Qazaqstan Respýblikasyndaǵy metsenattyq jáne qaiyrymdylyq qyzmetti damytýdaǵy eńbegi úshin azamattardy qoǵam bolyp taný jáne kótermeleý belgisi bolyp tabylady. 2017 jyldan bastap bul marapatqa 100-den astam adam ie boldy. Jańa dizain boiynsha tósbelgi dástúrli qazaq oiýy bar altyburyshty jibek qatqyl lentaǵa bekitilgen», - dedi Maia Bekbaeva.
Sondai-aq, ol «Jomart jan» tósbelgisiniń dizainy men mazmunyn qaitalap turǵan «Meiirim» tósbelgisiniń ornyna Qazaqstan halqy Assambleiasynyń «Alǵys» tósbelgisin engizýdi usyndy.
«Alǵys» tósbelgisi azamattardyń Qazaqstan halqy Assambleiasynyń qyzmetine jáne halyqtyń birligi men rýhani qundylyqtardy nyǵaitýǵa baǵyttalǵan áleýmettik, mádeni jáne aqparattyq jobalardy iske asyrýǵa belsendi qatysqany úshin beriledi. Tósbelgini tapsyrý quqyǵyn Qazaqstan halqy Assambleiasy Tóraǵasynyń orynbasary – Qazaqstan Respýblikasy Prezidenti Ákimshiliginiń QHA Hatshylyǵy meńgerýshisiniń qalaýy boiynsha usyný kózdeledi.
Bul tósbelgimen Qazaqstan Respýblikasynyń azamattaryn jáne erekshe jaǵdailarda shetel azamattaryn marapattaý josparlanýda. Árbir marapattalýshyǵa tiisti kýálik beriledi», - dedi Assambleia Tóraǵasynyń orynbasary.
Onyń aitýynsha, AQHA atynan beriletin qurmet gramotasy men alǵys hattardyń dizain jáne mazmuny ózgerissiz qalmaq.
«Jalpy, usynylyp otyrǵan ózgerister Assambleianyń qoǵamdyq nagradalarynyń biryńǵai jelisin qurýǵa jáne olardyń biryńǵai dizainerlik sheshimin qamtamasyz etýge múmkindik beredi. Mundai tásil Assambleianyń qoǵamdyq nagradalarynyń mártebesi men mańyzdylyǵyn arttyrýǵa múmkindik beredi», - dedi Maia Bekbaeva.
