Qazaqstan halqy Assambleiasy 10-11 tamyzda "Abai kúni" jáne uly aqyn Abaidyń 175 jyldyq mereitoiy qarsańynda respýblikalyq deńgeide onlain poeziia festivalin ótkizdi, - dep habarlaidy "Ult aqparat".
Basty maqsat - etnomádeni birlestikter arasynda uly aǵartýshynyń shyǵarmashylyǵyn nasihattap, qazaq tiliniń qoldanys aiasyn keńeitý.
Sondai-aq, elimizdegi turaqtylyq pen birlikti pash etýge arnalǵan poeziia festivaline bastapqyda memlekettik tildi erkin meńgergen 175 etnos ókilin qatystyrý kózdelgen.
Qatysýshylarǵa qazaq tilinde aqynnyń 175 óleńin oqyp, áleýmettik jelide túrli formatta beinetúsirilim jariialaý mindetteldi. Alaida 130 dan astam ult ókiliniń aqynǵa degen erekshe qurmeti men iltipaty bul mejeden asyp tústi.
Sonyń nátijesinde Qazaqstan halqy Assambleiasy baspasóz qyzmetine 705 beinerolik kelip tústi, ishinde 521 qatysýshy aqyn óleńderi men aýdarmalaryn qazaq tilinde oqyǵan. Qalǵan 127 qatysýshy basqa tilderde óleń oqydy.
126 qatysýshy Abai ánderin shyrqap, qara sózderin naqyshyna keltirip oqydy.
Al Qazaqstan halqy Assambleiasy tóraǵasynyń orynbasary Janseiit Túimebaev bul sharaǵa atsalysý maqsatynda jáne etnos ókilderin qoldaý úshin Abaidyń 37 qarasózin oqydy.
Qatysýshylardan túsken barlyq beinejazba Qazaqstan halqy Assambleiasy saity men óńirlik filialdardyń Facebook, Instagram, Vkontakte, Youtube, Telegramm kanalynda, túrli aqparattyq saittarda jariialandy.
Festival eki kúnge jalǵasty. Sondai-aq, Abai kúninde Qazaqstan halqy Assambleiasy ǵalymdary men sarapshylary Qazaqstan prezidenti Q.K.Toqaevtyń "Abai – rýhani reformator" maqalasyn talqylady. Elýden astam pikir buqaralyq aqparat quraldary betinde jariialandy.
Sondai-aq, Assambleia Túrkiia, Ázerbaijan, Ózbekstan, Qyrǵyzstan memleketiniń abaitanýshy-ǵalymdary men tarihshylarynyń qatysýymen "Abai: tarih jáne qazirgi zaman" halyqaralyq konferentsiiasyn ótkizdi.
Qazaqstan halqy Assambleiasynyń Abai kúnine arnalǵan is-sharalaryna respýblika boiynsha 27 795 etnos ókili qamtyldy. Onlain konferentsiiaǵa 965 sarapshy-ǵalym men tarihshy qatysty.
Sonymen qatar Qazaqstan halqy Assambleiasynyń "Álemdi aialaǵan sóz. Qazaqstan etnostarynyń ókilderi Abai týraly» kitabynyń onlain-tusaýkeserin ótkizdi.
"Qazaqstan etnostary ókilderiniń Abai týraly esseleri engizilgen "Álemge jetken sóz" jinaǵynyń tusaýkeseri ótti. Abai – qazaqtyń uly aqyny jáne oishyly. 2020 jyly Abaidyń 175 jyldyǵyn atap ótemiz. Álemdegi jaǵdaiǵa qaramastan, mereitoi aýqymdy jáne joǵary deńgeide atap ótiledi. Qazaqstan Respýblikasy Prezidentiniń bastamasymen 10 tamyz kúni Abai kúni bolyp jariialandy jáne mereke kúnderiniń tizbesine engizildi. Osy mereitoi qarsańynda ǵalymdar Uly Abaidyń eńbekterin zertteý boiynsha belsendi jumysqa kiristi", - dep habarlady Qazaqstan halqy Assambleiasy.
