Elordada júrgizilgen jedel aldyn alý sharasy barysynda asa aýyr qylmys jasaǵany úshin halyqaralyq izdeýde júrgen qylmysker ustaldy, dep habarlaidy QazAqparat Politsiia departamentine silteme jasap.
Qylmystyq qýdalaýdan jasyrynǵan er adam 25 jyldan astam izdeýde bolǵan. Anyqtalǵandai, 51 jastaǵy sottalǵan 1997 jyldyń tamyz aiynda Resei Federatsiiasynyń Rostov oblysynda óziniń sybailasymen eki azamatty óltirgen. Qylmys kólikti iemdený maqsatynda jasalǵan.
Ustalǵan azamatqa Resei Federatsiiasy Qylmystyq kodeksiniń 105-baby 2-bóligi boiynsha eki adamdy óltirdi degen aiyp taǵylyp otyr.
Qazirgi ýaqytta aiyptalýshy ýaqytsha ustaý izoliatoryna qamaldy, ekstraditsiialaý máselesi sheshilýde.
2022 jyldyń 09-18 naýryz aralyǵynda elordada aýqymdy «Izdeý» operatsiiasy júrgizilýde. Nur-Sultan qalasynda operatsiia bastalǵaly 20 qylmysker anyqtalyp, ustaldy, joǵalǵan alty azamat tabyldy.
