Almatydaǵy Pediatriia jáne balalar hirýrgiiasy ǵylymi ortalyǵynda 300-ge jýyq medbike jumys isteidi. Naýqas nárestelerdiń dertine daýa izdep, árbir emdelýshiniń jaǵdaiyn jasap, olardyń tez saýyǵyp ketýine úles qosyp júrgen medbikelerdiń alar orny bólek.
Solardyń biri Neonatologiia jáne jańa týǵan náresteler hirýrgiiasy bólimshesiniń medbikesi Gúljan Sádibek. Ol atalǵan ortalyqta 33 jyldan beri jumys istep keledi.
«Men eńbek etetin neonatologiia bóliminiń jaýapkershiligi mol. Tipti medbikelerdiń kóterer júgi eki ese aýyr desek te bolady. Óitkeni bul jerge jańa týǵan náresteler ǵana túsedi. Bizdiń qaraityn balalardyń salmaǵy 650 gramm. Árine olar erekshe kútimdi qajet etedi. Tipti tez salmaq qosyp, saýyǵyp ketýine medbikelerdiń qosar úlesi zor»,– deidi Gúljan Sádibek.
Onyń aitýynsha, inkýbatordaǵy (kiývez) náresteler medbikeniń tikelei qaraýynda bolady. Mundai jaǵdaida áriptesterim saqshy siiaqty táýlik boiy sábidiń janynan shyqpaidy. Olar kez kelgen sátte alǵashqy kómekke daiyn bolýy kerek.
«Shala týǵan jáne kúrdeli operatsiia jasalǵan shaqalaqtarǵa dári egýde de ońai sharýa emes. Alsań alaqanyńa siiatyn kishkentaidyń kók tamyryn taýyp, kateter qoiý da úlken eptilikti, tájirbieni talap etedi. Zerigerlik jumyspen teń desek te bolady»,– deidi medbike.
Sonymen qatar, ol sábi tez saýyǵyp, ata-analarynyń qolyna berilse balasha qýanatyndaryn aitty.
«Bala degen – úlken baqyt qoi. Kez-kelgen ata-ana sábiiniń deni saý bolǵanyn qalaidy. Óz kásibińe adal bolyp, barynsha qoldaý kórsetseń, ony halyq aityp júredi. Shúkir eńbegimizge dán riza ata-analar sany sheksiz», – deidi ol.
Dáriger eminiń nátijeli bolýy medbikeniń em-domdy ýaqtyly kórsetip, óz mindetin múltiksiz atqarýyna tikelei bailanysty. Naýqastyń densaýlyǵyna dárigerden kem jaýap bermeitin de solar.
«33 jyl az ýaqyt emes. Osy ýaqyt aralyǵynda meniń qolymnan 10 myńnnan astam sábi ótti. Qyzyǵy sol qazir olardyń aldy otbasyn quryp, ózderi de sábili boldy. Bizdi umypaidy. Áli kúnge deiin habarlasyp turady. Eńbektiń jemisi degen osy emes pe?»,– dep qortyndylady Gúljan Sádibek.
