Foto: TJM baspasóz qyzmeti
Nur-Sultanda 8-qabattan qulaǵan qyzdy qaǵyp alǵan taǵy bir adam - Saǵi Jylqyshiev te marapattaldy, - dep habarlaidy Tengrinews.kz tilshisi TJM baspasóz qyzmetine silteme jasap.
Vedomstvo málimetinshe, búgin elordalyq Tótenshe jaǵdailar departamentinde dosy Sábit Shontaqbaevpen birge segizinshi qabattyń terezesinen qulap bara jatqan qyzdy qutqarǵan Saǵi Jylqyshievti marapattaý rásimi ótti.
"Saǵi Jylqyshiev kórsetken erligi úshin QR TJM buiryǵymen "Tótenshe jaǵdaidaǵy erligi úshin" tósbelgisimen, alǵys hatpen jáne qol saǵatymen marapattaldy", - delingen habarlamada.
Eske salaiyq, 11 mamyrda Sábit dosymen birge tańerteń jumysqa bara jatqan kezde, adamdardy kórip, 8 qabatta turǵan balanyń aiqaiyn estip, dereý podezge júgirgen bolatyn. Kórshiler arqyly 7 qabatqa kóterilgen Sábit Saǵimen birge balany qutqarmaq bolǵan. Sábit terezeden ótip, Saǵi dosy bir qolymen aiaǵyn, ekinshi qolymen terezeni ustap saqtandyryp turdy.
"Biz aiqailardy estip, ilinip turǵan balany kórdik, oiymyz tek balany qutqarý boldy, oilanbastan júgirdik", - degen edi Saǵi Jylqyshiev.
