QR Ulttyq akademiialyq kitaphanada belgili kinotanýshy Baýyrjan Nógerbektiń ómiri men shyǵarmashylyǵyna arnalǵan «Kinotanýshy Baýyrjan Nógerbek» kitaby tanystyryldy, dep habarlaidy "Ult aqparat".
Jinaq belgili kinotanýshy, kórnekti ǵalym, professor, Qazaqstanda kinotanýdyń negizin qalaýshy, Baýyrjan Nógerbektiń ómiri men shyǵarmashylyǵyna arnalǵan.
Onda Baýyrjan Nógerbektiń qazaq kino óneri, onyń qalyptasý jáne damý tarihy, ulttyq kino óndirisiniń erekshelikteri týraly ár jyldary baspasóz betine shyqqan maqalalary men suhbattary, arhiv qujattary men fotosýretteri jinaqtalǵan. Sondai-aq synshynyń ómiri, shyǵarmashylyǵy men qairatkerlik kelbeti týraly áriptesteri men shákirtteriniń, dos-jarandary men týǵan-týystarynyń estelikteri berilgen.
«Baýyrjan – respýblika ǵana emes, Keńes odaǵyna, postkeńestik elderge de belgili kino teoriiasynyń jarshysy, tereń bilimdi kinosynshy. Keńes kezinde de Baýyrjannyń sózderimen, pikirlerimen sanaspaityn kinoger bolmaityn. Árine, synshy retinde synshynyń qyzmeti, ómirlik ustanymy negizgi shyǵarmalardy jasaityn sýretkerlerden góri qiynyraq. Eshbir jaǵdaiattarǵa qaramai, ásirese shyǵarmashylyq adamynyń kóńil kúiine qaramai, shyndyqqa sai oi aita biletin synshy sol sáttegi yńǵaisyzdyqqa tótep bere alsa, ýaqyt ótken saiyn «ádil synshy» ataǵyna ie bolady. Sebebi, aqiqat – qashanda ýaqyt ólshemimen aiqyndalatyn syr. Búgingi uǵymdarmen aiqyndasaq, synshy sarapshy, ekspert, diagnostik syndy uǵymdarǵa jaqyn. Onyń saiasi, áleýmettik, ideologiialyq, týysqandyq, dostyq, korporativtik qajettilikterden alshaq bolýy jáne ózi aitqan tujyrymdaryn árkez dáleldep bere alatyny – úlken qasiet», - dedi dóńgelek ústel moderatory, kinorejisser, prodiýser, Qazaq ulttyq óner ýniversitetiniń professory Slambek Táýekel.
Kitap Almaty qalasyndaǵy Qazaq ýniversiteti baspasynan shyǵyp otyr. Qurastyrýshylary – Baýyrjan Nógerbektiń jary, belgili teatrtanýshy Gúljahan Bekhojina jáne uly, belgili kinotanýshy, Phd doktory, T. Júrgenov atyndaǵy Qazaq ulttyq óner akademiiasynyń «Kino tarihy men teoriiasy» kafedrasynyń dotsenti Baýbek Nógerbek.
«Ákem kózi tirisinde óziniń 70 jasyna qazaq tilindegi maqalalar jinaǵyn shyǵarǵysy kelgen edi. Buǵan deiin orys tilinde birneshe kitaptary shyqqan. 1970 jyldardan beri kólemdi material jinaqtalǵan edi. Biraq, ákemiz 68 jasynda syrqattanyp, 2017 jyly qaitys boldy. Kitap shyǵarý jumystary keiinge qaldy. Al qazir kitap formatyn keńeitip, maqalalary men suhbattaryn jáne shyǵarmashylyǵy týraly zertteýler men estelikterdi birge shyǵardyq», - dedi Baýbek Nógerbek.
Sonymen birge, kinosynshynyń shákirti, QR Prezidentiniń baspasóz hatshysy Berik Ýáli ustazy týraly estelik jazdy.
«Baýyrjan aǵai – shynymen de Qazaqstandaǵy kásibi kinotaný mektebiniń negizin qalaýshy. 1993 jyly T. Júrgenov atyndaǵy teatr jáne kino institýtynda «Kinotaný» mamandyǵy ashylǵanyn bilip, eń alǵash osy sheberhanaǵa jazylǵanbyz. Jalpy qazaq kino óneriniń tarihyndaǵy osy Kinotaný mektebiniń negizin Baýyrjan Nógerbek qalaǵan. Keiin astanaǵa aýysyp, Óner ýniversitetinde de shákirtter tárbieledi. Baýyrjan aǵai óz ortasynda da, áriptesteri men zamandastary arasynda syily, bedeldi azamat bolǵanyn bilemiz. Ulaǵatty ustazdyǵynan bólek, adamgershiligi de mol, sol kezdegi 16-17 jastaǵy balalardy qalanyń qym-qýyt tirligine beiimdep, baptaǵan bapkerimiz boldy. Aǵalyq, ákelik qamqorlyǵynyń arqasynda qalaǵa sińisip ketýimizge Baýyrjan Ramazanulynyń úlken septigi tidi», - dedi B. Ýáli.
