Memlekettik hatshy Qyrymbek Kósherbaev Ulttyq komissiia otyrysynda qoǵamdyq sanany jańǵyrtý baǵdarlamasyn iske asyrý týraly aitqan bolatyn. Osyǵan orai «Ulttyq kinony qoldaý memlekettik ortalyǵy» KEAQ basqarma tóraǵasy Esetjan Qosýbaev pikir bildirdi, dep habarlaidy QazAqparat.
Qazaqstan Respýblikasy Prezidentiniń janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy barysynda «Ulttyq kinony qoldaý memlekettik ortalyǵy» KEAQ basqarma tóraǵasy Esetjan Qosýbaev otandyq kinoindýstriiany damytýǵa qatysty mańyzdy máselelerdi qozǵady.
Onyń aitýynsha, biz - álemdik qurylymnyń túbegeili ózgerýiniń, álemniń kóptegen memleketteriniń qoǵamdyq-saiasi qalyptasýynyń tek kýágeri ǵana emes, tikelei qatysýshysymyz.
«Tarihi jáne mańyzdy oqiǵalarǵa toly dáýir tez ótip barady, olar, shyǵarmashylyq tilmen aitqanda, dekoratsiialar, natýralyq lokatsiialar men akterleri dinamikalyq túrde aýysatyn jahandyq spektakl nemese áserli blokbaster ispettes. Bul rette tek passionarlyq kezeńderdi ǵana emes, sonymen birge kelesidei tarihtaǵy dramalyq sátterdi de tereń jáne kásibi túrde kórsetetin ádebi, kórkem, beineleý týyndylarynyń, teatr jáne sahnalyq qoiylymdardyń shyǵarylýy ózekti ekeni sózsiz», - deidi ol.
Sonymen qatar, ol búgingi Qazaqstannyń tarihy mańyzdy jahandyq oqiǵalarǵa toly ekenin atap ótti.
«Atalǵan tarihtyń negizgi kezeńderi rýhani jáne áleýmettik-mádeni saladaǵy materialdyq jáne materialdyq emes aktivterde oryn alýǵa tolyq quqyly. Munda, árine, mádeni-indýstriialyq ónim retindegi ámbebaptyǵyn eskere otyryp, kinonyń róli men múmkindikterine kúmán keltirýge bolmaidy», - deidi Esetjan Qosýbaev.
Onyń sózinshe, otandyq kino salasy 2001 jyldan 2020 jylǵa deiin el biýdjetimen shamamen 70 mlrd teńge kóleminde qarjylandyrylǵan.
«Árine, halyqaralyq kinofestivalderde úlken jetistikterge jetip, eń bedeldi halyqaralyq kinosyilyqtardyń qysqa tizimine engen sátti nátijeler bolǵany sózsiz, degenmen, eger biz bul jetistikterdi memlekettiń, dálirek aitsaq, salyq tóleýshilerdiń, halyqtyń qaltasynan bólingen qoldaýmen salystyratyn bolsaq, onda «taý tolǵatyp, tyshqan týdy» deýge bolady. Búginde Mádeniet jáne sport ministrliginiń, UKQMO, «Qazaqfilm» kinostýdiiasynyń basty mindeti – kórsetilgen qamqorlyqqa naqty jáne nátijeli jaýap berý. Qazaqstan kinematografy óziniń túrli segmentterimen osy mańyzdy salada júrip jatqan barlyq úderisterdiń álemdik júiesindegi óz ustanymy men ornyn anyqtaýy kerek. Halyq aqshasy úshin jaýapkershilikti sezinbesten, biýdjetti tek tutynýshylyq turǵydan qabyldaý - bul sózdi aitýǵa qoryqpaimyn, baryp turǵan azǵyndyq», - deidi ol.
«Ulttyq kinony qoldaý memlekettik ortalyǵy» KEAQ basqarma tóraǵasy kino salasyna qatysty óz usynystaryn aitty.
«Prezident atap ótkendei, álemdegi eń iri kinoóndirýshi jáne strimingtik kompaniialar Aziiaǵa qyzyǵýshylyq tanytyp otyr. Jańartylǵan Zańǵa biz kinoserial, kinospektakl uǵymdaryn engizgimiz keledi. Búginde dál osy janrlar kórermen arasynda úlken suranysqa ie. Bizdiń kino óndirýshilerdi «ulttyq» degen mártebege sai kontentti jasaýǵa baǵyttaýymyz kerek. Bul tarihi taqyryptaǵy filmder, Qazaqstannyń uly qairatkerleri týraly áleýmettik mańyzy bar, jastarǵa arnalǵan derekti týyndylar, halyqaralyq kino naryǵyna shyǵatyn balalarǵa arnalǵan animatsiialyq kartinalar. Ortalyq «Altyn Orda» atty iri jobany iske asyrýǵa daiyndyqty bastady. Árine, bul - kino qairatkerleriniń, memlekettik qurylymdardyń, álemdik kino ortalyqtarynyń seriktesteriniń ekstensivti emes, irgeli tásildemelerin, iaǵni halyqaralyq konsortsiým qurýdy talap etetin úlken órshil habarlandyrý. Qazaqstan Táýelsizdiginiń 30 jyldyǵy kinematograftyń barlyq janrlarynda eń joǵary ideialyq-kórkemdik deńgeide kórinis tabýy tiis», - deidi spiker.
