مەملەكەتتٸك حاتشى قىرىمبەك كٶشەرباەۆ ۇلتتىق كوميسسييا وتىرىسىندا قوعامدىق سانانى جاڭعىرتۋ باعدارلاماسىن ٸسكە اسىرۋ تۋرالى ايتقان بولاتىن. وسىعان وراي «ۇلتتىق كينونى قولداۋ مەملەكەتتٸك ورتالىعى» كەاق باسقارما تٶراعاسى ەسەتجان قوسۋباەۆ پٸكٸر بٸلدٸردٸ, دەپ حابارلايدى قازاقپارات.
قازاقستان رەسپۋبليكاسى پرەزيدەنتٸنٸڭ جانىنداعى قوعامدىق سانانى جاڭعىرتۋ باعدارلاماسىن ٸسكە اسىرۋ جٶنٸندەگٸ ۇلتتىق كوميسسييانىڭ وتىرىسى بارىسىندا «ۇلتتىق كينونى قولداۋ مەملەكەتتٸك ورتالىعى» كەاق باسقارما تٶراعاسى ەسەتجان قوسۋباەۆ وتاندىق كينويندۋسترييانى دامىتۋعا قاتىستى ماڭىزدى مەسەلەلەردٸ قوزعادى.
ونىڭ ايتۋىنشا, بٸز - ەلەمدٸك قۇرىلىمنىڭ تٷبەگەيلٸ ٶزگەرۋٸنٸڭ, ەلەمنٸڭ كٶپتەگەن مەملەكەتتەرٸنٸڭ قوعامدىق-ساياسي قالىپتاسۋىنىڭ تەك كۋەگەرٸ عانا ەمەس, تٸكەلەي قاتىسۋشىسىمىز.
«تاريحي جەنە ماڭىزدى وقيعالارعا تولى دەۋٸر تەز ٶتٸپ بارادى, ولار, شىعارماشىلىق تٸلمەن ايتقاندا, دەكوراتسييالار, ناتۋرالىق لوكاتسييالار مەن اكتەرلەرٸ ديناميكالىق تٷردە اۋىساتىن جاھاندىق سپەكتاكل نەمەسە ەسەرلٸ بلوكباستەر ٸسپەتتەس. بۇل رەتتە تەك پاسسيونارلىق كەزەڭدەردٸ عانا ەمەس, سونىمەن بٸرگە كەلەسٸدەي تاريحتاعى درامالىق سەتتەردٸ دە تەرەڭ جەنە كەسٸبي تٷردە كٶرسەتەتٸن ەدەبي, كٶركەم, بەينەلەۋ تۋىندىلارىنىڭ, تەاتر جەنە ساحنالىق قويىلىمداردىڭ شىعارىلۋى ٶزەكتٸ ەكەنٸ سٶزسٸز», - دەيدٸ ول.
سونىمەن قاتار, ول بٷگٸنگٸ قازاقستاننىڭ تاريحى ماڭىزدى جاھاندىق وقيعالارعا تولى ەكەنٸن اتاپ ٶتتٸ.
«اتالعان تاريحتىڭ نەگٸزگٸ كەزەڭدەرٸ رۋحاني جەنە ەلەۋمەتتٸك-مەدەني سالاداعى ماتەريالدىق جەنە ماتەريالدىق ەمەس اكتيۆتەردە ورىن الۋعا تولىق قۇقىلى. مۇندا, ەرينە, مەدەني-يندۋسترييالىق ٶنٸم رەتٸندەگٸ ەمبەباپتىعىن ەسكەرە وتىرىپ, كينونىڭ رٶلٸ مەن مٷمكٸندٸكتەرٸنە كٷمەن كەلتٸرۋگە بولمايدى», - دەيدٸ ەسەتجان قوسۋباەۆ.
ونىڭ سٶزٸنشە, وتاندىق كينو سالاسى 2001 جىلدان 2020 جىلعا دەيٸن ەل بيۋدجەتٸمەن شامامەن 70 ملرد تەڭگە كٶلەمٸندە قارجىلاندىرىلعان.
«ەرينە, حالىقارالىق كينوفەستيۆالدەردە ٷلكەن جەتٸستٸكتەرگە جەتٸپ, ەڭ بەدەلدٸ حالىقارالىق كينوسىيلىقتاردىڭ قىسقا تٸزٸمٸنە ەنگەن سەتتٸ نەتيجەلەر بولعانى سٶزسٸز, دەگەنمەن, ەگەر بٸز بۇل جەتٸستٸكتەردٸ مەملەكەتتٸڭ, دەلٸرەك ايتساق, سالىق تٶلەۋشٸلەردٸڭ, حالىقتىڭ قالتاسىنان بٶلٸنگەن قولداۋمەن سالىستىراتىن بولساق, وندا «تاۋ تولعاتىپ, تىشقان تۋدى» دەۋگە بولادى. بٷگٸندە مەدەنيەت جەنە سپورت مينيسترلٸگٸنٸڭ, ۇكقمو, «قازاقفيلم» كينوستۋديياسىنىڭ باستى مٸندەتٸ – كٶرسەتٸلگەن قامقورلىققا ناقتى جەنە نەتيجەلٸ جاۋاپ بەرۋ. قازاقستان كينەماتوگرافى ٶزٸنٸڭ تٷرلٸ سەگمەنتتەرٸمەن وسى ماڭىزدى سالادا جٷرٸپ جاتقان بارلىق ٷدەرٸستەردٸڭ ەلەمدٸك جٷيەسٸندەگٸ ٶز ۇستانىمى مەن ورنىن انىقتاۋى كەرەك. حالىق اقشاسى ٷشٸن جاۋاپكەرشٸلٸكتٸ سەزٸنبەستەن, بيۋدجەتتٸ تەك تۇتىنۋشىلىق تۇرعىدان قابىلداۋ - بۇل سٶزدٸ ايتۋعا قورىقپايمىن, بارىپ تۇرعان ازعىندىق», - دەيدٸ ول.
«ۇلتتىق كينونى قولداۋ مەملەكەتتٸك ورتالىعى» كەاق باسقارما تٶراعاسى كينو سالاسىنا قاتىستى ٶز ۇسىنىستارىن ايتتى.
«پرەزيدەنت اتاپ ٶتكەندەي, ەلەمدەگٸ ەڭ ٸرٸ كينوٶندٸرۋشٸ جەنە ستريمينگتٸك كومپانييالار ازيياعا قىزىعۋشىلىق تانىتىپ وتىر. جاڭارتىلعان زاڭعا بٸز كينوسەريال, كينوسپەكتاكل ۇعىمدارىن ەنگٸزگٸمٸز كەلەدٸ. بٷگٸندە دەل وسى جانرلار كٶرەرمەن اراسىندا ٷلكەن سۇرانىسقا يە. بٸزدٸڭ كينو ٶندٸرۋشٸلەردٸ «ۇلتتىق» دەگەن مەرتەبەگە ساي كونتەنتتٸ جاساۋعا باعىتتاۋىمىز كەرەك. بۇل تاريحي تاقىرىپتاعى فيلمدەر, قازاقستاننىڭ ۇلى قايراتكەرلەرٸ تۋرالى ەلەۋمەتتٸك ماڭىزى بار, جاستارعا ارنالعان دەرەكتٸ تۋىندىلار, حالىقارالىق كينو نارىعىنا شىعاتىن بالالارعا ارنالعان انيماتسييالىق كارتينالار. ورتالىق «التىن وردا» اتتى ٸرٸ جوبانى ٸسكە اسىرۋعا دايىندىقتى باستادى. ەرينە, بۇل - كينو قايراتكەرلەرٸنٸڭ, مەملەكەتتٸك قۇرىلىمداردىڭ, ەلەمدٸك كينو ورتالىقتارىنىڭ سەرٸكتەستەرٸنٸڭ ەكستەنسيۆتٸ ەمەس, ٸرگەلٸ تەسٸلدەمەلەرٸن, ياعني حالىقارالىق كونسورتسيۋم قۇرۋدى تالاپ ەتەتٸن ٷلكەن ٶرشٸل حابارلاندىرۋ. قازاقستان تەۋەلسٸزدٸگٸنٸڭ 30 جىلدىعى كينەماتوگرافتىڭ بارلىق جانرلارىندا ەڭ جوعارى يدەيالىق-كٶركەمدٸك دەڭگەيدە كٶرٸنٸس تابۋى تيٸس», - دەيدٸ سپيكەر.
