Foto: QR MAM
2 qazan kúni Aqtaýdaǵy Dostyq úiinde halyqaralyq «Qorqyt ata» kinofestivali aiasynda Túrki álemi kinosammiti uiymdastyryldy. «Túrki álemi jáne kino: yntymaqtastyqtyń jańa kókjiekteri» taqyrybyn arqaý etken jiyn kino óneri arqyly mádeni bailanysty nyǵaitýdy kózdedi, dep habarlaidy Ult.kz.
Kinosammitke memlekettik organdar, ulttyq kinoortalyqtar, sarapshylar men rejisserler qatysyp, kino salasyndaǵy memlekettik saiasat, halyqaralyq koprodýktsiia jáne birlesken jobalardyń bolashaǵy talqylandy.
Alǵashqy panelde ulttyq kinematografiiany qoldaý baǵytyndaǵy memlekettik saiasatqa nazar aýdaryldy. Ulttyq kinony qoldaý memlekettik ortalyǵynyń basqarma tóraǵasy Qurmanbek Jumaǵali sońǵy alty jyldaǵy jumys nátijelerin usyndy. Onyń aitýynsha, osy kezeńde 119 kinojoba júzege asyrylyp, onyń ishinde 34-i jas rejisserlerdiń debiýttik filmi. Qazaqstandyq kartinalar 300-den astam halyqaralyq festivalge qatysyp, 177 júldege ie bolǵan.
Foto: QR MAM
Ázerbaijan, Qyrǵyzstan, Ózbekstan, Túrikmenstan jáne Túrkiiadan kelgen kino mamandary da óz tájiribesin bólisip, ortaq naryq qurýdyń múmkindikterin, birlesken óndiristerdi damytýdyń mańyzyn atap ótti.
Kinosammit qorytyndysynda qatysýshylar túrki elderiniń kinematografiiadaǵy yntymaqtastyǵyn jańa deńgeige kóterýge jáne ortaq jobalardy júzege asyrýǵa daiyn ekenderin bildirdi.
