Almatyda 14-shi Halyqaralyq Sháken Aimanov kinofestivali sheńberinde Qazaqstan kinematografister odaǵynyń ulttyq «Qulager» júldesin tabystaý rásimi ótti. Júldeniń basym bóligine Sh.Aimanov atyndaǵy «Qazaqfilm» kinostýdiiasy jaryqqa shyǵarǵan filmder ie boldy, dep habarlaidy "Ult aqparat" tilshisi kinostýdiianyń baspasóz qyzmetin silteme jasap.
Belgili bolǵandai, «Eń úzdik film» júldesi Sábit Qurmanbekovtyń «Oralman» filmine, al «Úzdik akter» júldesi osy filmde basty róldi somdaǵan Dýlyǵa Aqmoldaǵa buiyrdy.
Qazaqstan kinematografister odaǵynyń sheshimimen Ardaq Ámirqulov úzdik rejisser atandy («Únsizdikte» filmi úshin). «Úzdik aktrisa» júldesin «Aika» filminde basty rólde oinaǵan Samal Esliamovaǵa enshiledi. «Úzdik stsenarii» nominatsiiasynda «Ákege qońyraý shalý» filminiń stsenarii avtory Serik Aprymov jeńiske jetse, úzdik prodiýser retinde «Almas qylysh» filminiń prodiýseri Arman Asenovtyń esimi ataldy.
«Qulager» júldesin derekti kino ókilderi de aldy. Máselen, «Altyn Emel» filminiń rejisseri Oleg Belialov «úzdik rejisser-dokýmentalist» júldesine ie boldy. Al Anvara Sadyqova men Ǵaziz Nasyrov túsirgen «Qazaq bii» derekti filmi «Úzdik derekti film» júldesine qol jetkizdi.
Ulttyq kinojúldeni tabystaý rásiminde qazaq animatsiiasy da erekshe ataldy. Sh.Aimanov atyndaǵy «Qazaqfilm» kinostýdiiasy jaryqqa shyǵarǵan tolyqmetrajdy «Muzbalaq» filmi «Úzdik animatsiialyq film» júldesin ielendi. Odan bólek, «Qulager» júldesi Ramil Ýsmanovqa (úzdik rejisser-animator) jáne qazaq animatsiiasynyń damýyna úles qosqany úshin Jáken Dánenovqa tabystaldy.
Otandyq jas kinogerler de qur qol qaitpady. «Úzdik qysqametrajdy film» júldesi «Asan» filmi úshin Berik Jahanovqa, al «Úzdik debiýt» júldesi «Na grani» filminiń rejisseri Aldiiar Bairakimovqa tabystaldy.
Sarapshy komissiia qazaq kinosynyń basqa da ókilderin júldemen marapattady. «Almas qylysh» kartinasy úshin Ajar Áýbákirova úzdik kostiým jónindegi sýretshi dep tanyldy. Odan bólek, «Qulager» músinshesin: operator Azamat Dýlatov («Lift»), dybys rejisseri Sergei Lobanov («Únsizdikte»), kompozitor Qýat Shildebaev («Túrksib»), qoiýshy-sýretshi Ómirzaq Shmanov («Únsizdikte»), sýretshi-grimer Lidiia Ordynskaia («Anaǵa aparar jol»), sondai-aq, kaskader Qasym Jumaǵojinder ie boldy. Kinodaǵy úzdik effekti - «Cubic» stýdiiasynda.
Qazaq kinosyna qosqan úlesi úshin Qadyr Qosai men Igor Vovniankoǵa Qulager syilyǵy tabystalyp, kinotanýshy Názira Muqyshevaǵa da músinshe berildi.
