© Photo: pixabay.com
Oral qalasynda qoqys jáshigine balasyn tastap ketken áiel oqiǵany baiandap berdi, dep habarlaidy Sputnik Qazaqstan agenttigi "Moi gorod" portalyna silteme jasap.
Anasynyń aitýynsha, ol balasyn monshada jalǵyz ózi bosanǵan. Áiel tórtinshi júktiligin ata-anasynan jasyrǵan. Ol eki jyl buryn kúieýimen ajyrasqan. Kúieýi bala tárbiesine kómektespegen, biraq aliment tólep turǵan. Ajyrasqaly beri kelinshek ata-anasymen birge páter jaldap turǵan. Úsh balasy kishkentai bolǵandyqtan, jumys isteýge múmkindik bolmaǵan. Áieldiń aitýynsha, qaiyn enesimen til tabysa almaǵan.
"Men tórtinshi júktiligim týraly bilgenimde, kezdesip júrgen jigitime mán-jaidy baiandadym. Ol meni tyńdamastan, telefon tutqasyn qoia saldy. Keiinnen maǵan bilgenińdi iste dedi. Men ata-anama aitýdan qoryqtym. Meniń júktiligimdi emhanadaǵy akýsher ǵana biletin. Ol túsik jasatýǵa kel dedi, biraq men bara almadym", — deidi áiel.
Aitýynsha, áieldiń balasyn óltirý týraly oiy bolmaǵan. Tolǵaǵy qysqan kezde áke-sheshesi men balalary uiyqtap jatqan.
"Men jaldap turyp jatqan úidiń iesinen monshaǵa túsip alaiyn dep suradym. Tolǵaǵym qysqan kezde monshaǵa bardym. Ózim bosanyp, kindigin ózim kesip, balany shomyldyrdym. Syrtqa shyǵyp, balany qoqysqa aparmas buryn biraz oilandym. Ne istesem eken dep basym qatty. Ol ýaqyt tańǵy saǵat 04:00 shamasy bolatyn. Ne istep, ne qoiǵanymdy bilýge mursham bolmady", — deidi áiel.
Áiel jasaǵan isine ókinetinin jáne barlyq balasyn ózine qaitarǵysy keletinin aitady. Bolǵan oqiǵadan keiin onyń úlken balalary ákesinde qalsa, qoqys jáshiginde qaldyrylǵan balasy – balalar úiinde. Ol balalar úiindegi ulyna birneshe ret barǵan, biraq balany kórsetpegen.
Qazir áiel jasaǵan qylmysy úshin sotty kútip júr. Sottan keiin qamqorshylyq organdary náresteniń bolashaq taǵdyryn sheshedi.
