Ýkrainalyq BAQ 1 naýryzda kúndiz Kievtegi telemunaraǵa reseilik zymyrandardyń soqqysy tigeni týraly aqparat taratty, - dep habarlaidy Tengrinews.kz.
Oqiǵanyń sýret, videosyn "Priamoi" jáne "Sýspilne" telearnalary, sondai-aq, Strana.ua basylymy jariialady. Videoǵa soqqy tigen sát túsip qalǵan.
Ýkrainanyń tótenshe jaǵdailar jónindegi memlekettik qyzmetiniń aqparaty boiynsha, telemunaraǵa tigen soqqy nátijesinde bes adam qaza taýyp, taǵy bes adam jaraqat alǵan.
"Saǵat 18:00-de bolǵan, Shevchenkov aýdanyndaǵy Kiev teledidar munarasyndaǵy oqiǵa saldarynan bes adam qaza taýyp, bes adam jaraqat aldy. Jumystar jalǵasyp jatyr", - dedi vedomstvo ókili.
Jarylys bolǵannan keiin Ýkrainanyń ortalyq telearnalary efirden joǵalyp ketti, keiinirek olardyń jumysy qalpyna keltirildi.
"Soqqy telemunaradaǵy apparattyq habar taratýshyǵa tidi. Ýaqytsha habar taratýda problemalar shyqty. Radiostantsiialardy tyńdaýǵa bolady. Jaqyn arada rezerv habar taratý qyzmeti iske qosylady", - delingen Joǵarǵy Rada Telegram kanalynda.
Oqiǵadan keiin Kiev meri Vitalii Klichko Ýkraina astanasynyń turǵyndaryna Facebook arqyly ún qatty.
"Aldyn ala málimetter boiynsha, telemunaraǵa túsken eki zymyran saldarynan bes beibit Kiev turǵyny qaza tapty. Olar munaranyń janynan trotýarmen ótip bara jatqan. Kievtikterdi kóshede júrmeýge shaqyramyn! Múmkindiginshe, abai bolyńyzdar. Túnde baspanalaryńyzda bolyńyzdar. Qazir mamandar telemunaranyń tolyq jumysyn qalpyna keltirý úshin jumys istep jatyr. Sandyq efirlik habar taratý qyzmeti ishinara qalpyna keltirildi. Sondai-aq, telearnalardy kabel jelileri, spýtnik jáne onlain-habar taratý arqyly qaraýǵa bolady. Qalamyzdy qorǵaý úshin birigeiik!" - dedi bokstan burynǵy álem chempiony.
