Qazaqstannyń Ýkrainadaǵy elshisi Darhan Káletaev Kiev qalasyndaǵy bizdiń elshiliktiń jórtólesin 40 adamnyń panalap otyrǵanyn málim etti, dep habarlaidy QazAqparat.
«Kievtegi elshiliktiń jertólesinde 40 adam otyr. Evakýatsiiaǵa ótinishter saǵat saiyn ósýde. Kóbi "bári oidaǵydai bolady" dep úmittengen bolýy kerek. Biz barlyǵyn oilastyryp jatyrmyz, sheshimin izdeýdemiz jáne bárimen bailanystamyz. Sondyqtan azamattarymyzdy sál sabyr etýge shaqyramyz. Bizdiń maqsat – Ýkrainadaǵy qazaqstandyqtardyń qaýipsizdigin qamtamasyz ete otyryp, elden aman-saý alyp shyǵý. Biz qoldan kelgenniń bárin jasaimyz», - dedi Darhan Káletaev.
Odan bólek, elshi syn saǵatta tegin kómektesip jatqan Ýkrainadaǵy konsýldarǵa alǵysyn bildirdi.
«Qazaqstandyq konsýldyqtar týraly jeke aitqym keledi. Qurmetti konsýldar, Ýkrainanyń azamattary, olar tegin jumys istep jatyr. Mysaly QR qurmetti konsýly Galina Masliýk qazaqstandyqtar mingen Lvovtan Polshaǵa deiingi avtobýstyń qunyn óz qaltasynan tóledi. Bizdiń azamattardy evakýatsiialaýda kóptegen adam eńbektenip jatyr. Olardyń deni - volonterler. Biz qol ushyn sozyp jatqan azamattarǵa aqy tólemeimiz», - deidi ol.
