Qazaqstan Cyrtqy ister ministrliginiń resmi ókili Aibek Smadiiarov Ýkrainadaǵy jaǵdaiǵa bailanysty qazaqstandyq diplomattardyń kúni-túni jumys istep jatqanyn atap ótti, dep habarlaidy "Ult aqparat".
"Sońǵy birneshe kún boiy álemniń nazary Ýkrainada. Bizdiń Kievtegi elshiliktiń qyzmetkerleri kúni-túni jumys isteýde. Qazaqstannyń azamattaryna kómek kórsetip qana qoimai, ornalasqan elderindegi jaǵdai jóninde ózekti aqparatty da jiberip turady.
Shuǵyl aqparat almasý, týyndaǵan máselelerdi jedel sheshý maqsatynda árine belgili bir messendjerde jumys chatyn ashtyq. Sol chatta birge qýanyp, birge kúrsinip jatamyz. Ýkrainadaǵy áriptesterimizge suraqtardy jaýdyryp, sol turǵan jerinde jaýap ber dep jazatynymyz da bar.
Keshe ǵana BAQ-qa arnalǵan brifingte aityp ótkenimdei, QR azamattary bar birneshe avtobýs shekaraǵa qarai jolda kólik keptelisinde turdy. Olardyń jartysy shekaradan ótip, aman-esen Polshanyń aýmaǵynda azamattarymyzdyń ekinshi toby kelgenshe qonaq úige ornalastyryldy" - dep jazdy Smadiiarov.
Sondai-aq resmi ókildiń aitýynsha, birinshi toppen ilesip kele jatqan diplomattardyń arasynda áiel adam da bar. Ol jaǵdai shielenisken alǵashqy kúnnen bastap 24 saǵat uiqy men demalys bilmei qyzmetin adal atqaryp keledi.
"Qashan telefonmen qońyraý shalmasań da, birden jaýap berip, tolyq ózekti aqparat beredi. Daýsynan baiqalyp turady qobaljyǵany, biraq bildirmeidi.
Tek Polshaǵa kelgende kóńili bosap, kishkene emotsiiaǵa berildi. Alaida diplomattarǵa ondai minez belgisiz, sondyqtan jarty saǵattan keiin "keshirim suraimyn, qaitadan qatardamyn, tapsyrma bar ma" dep chatqa jazdy.
Leila hanym, qazaq diplomatiiasynyń betke ustar ókili dep tanimyn sizdi. Taǵy kishkene ýaqyttan keiin elde qaýyshamyz degen senimdemin. Qyz bala bolǵandyqtan repatriatsiialyq reispen elge qaitaryp jatyrmyz.
Men biletin Leila bolsa Qazaqstanǵa kelip demalyp jatpai, Syrtqy ister ministrligine kelip, Ýkrainadaǵy jaǵdaiǵa bailanysty qurylǵan jumys tobynyń jumysyna kirisip ketetini anyq.
Osy post arqyly ózimniń osyndai áriptesterimmen tanystyryp, diplomatiia qyzmetiniń qyr-syryn aitaiyn degenim ǵoi" - dep jazdy ol Facebook paraqshasynda.
