Kikboksingten Ýkraina men Eýropanyń birneshe dúrkin chempiony, 20 jyldyq tájiribesi bar jattyqtyrýshy, kikboksing federatsiiasynyń prezidenti Nikolai Akijanov Kiev mańyndaǵy oqiǵa kezinde qalada bolǵan. Qazaqstan týmasy eki apta bolǵan atys kezinde qalai aman qalǵanyn aityp berdi, - dep habarlaidy Tengrinews.kz tilshisi.
Qaqtyǵys bastalǵan kezde Nikolai Kiev oblysynyń Býcha qalasynda bolǵan. Onyń aitýynsha, tolqý birden bastalǵan. Alǵashqy kúnderi janarmai beketteri men dúkenderde kezek paida bolǵan.
"Alǵashqy jarylys daýysy tańerteń erte estildi. Saǵat 11-de ushaqtar paida boldy. Qatty qorqynyshty boldy. Zymyran úige túsip jatty, adamdar jertólege tyǵyldy, aqyldarynan adasty. Birinshi, ekinshi kúnder jaryq pen gaz boldy. Sodan keiin snariad qulap, kórshi úide gaz qubyry jarylyp, gaz óshti. Sý men gazsyz bir apta turdyq", - dedi Nikolai.
Nikolai Akijanov jattyǵý ótkizgen Kievtegi sportzalǵa zymyran túsip, ǵimarat órtenip ketken. Ol jumyssyz qalǵan. Áńgime barysynda er adam Lvovqa jetýdi josparlap otyrǵanyn jáne sol jerden Qazaqstan azamattarymen birge Polsha arqyly Otanyna orala alatynyn atap ótti. Qazaqstanda kómektesetin týystary men dostary bar eken.
"Men qazaqpyn, Eýropa maǵan kerek emes. Ózimmen tek eki sómke alamyn. Ne bolatynyn bilmeimin. Bárin basynan bastaityn shyǵarmyn. Menińshe, bul - tús, oiansam, bári burynǵydai bolady. Jattyǵý zalyna baramyn", - dedi ol.
Qazaqstannyń Ýkrainadaǵy elshiligi Akijanovpen bailanys jasap, oǵan kómek kórsetip jatyr. Qazaqstannyń Ýkrainadaǵy tótenshe jáne ókiletti elshisi Darhan Káletaev Ýkraina azamattarynyń 18 jastan 60 jasqa deiin ketýine tyiym salynǵanyna qaramastan, Nikolai Akijanov ekinshi toptaǵy múgedektigine bailanysty kete alatynyn atap ótti. Sonymen qatar, Káletaev onyń batyl ekenin aitty. Óitkeni ol atys bolǵan kúnderi kóptegen adamǵa kómektesken.
