Kievte Qazaqstan aýmaǵynda esirtki taratýmen ainalysqan halyqaralyq qylmystyq uiymnyń call-ortalyqtary áshkerelendi, dep habarlaidy ult.kz.
Qazaqstan Ishki ister ministrligi Ýkraina Ulttyq politsiiasymen jáne eki eldiń bas prokýratýralarymen birlesip júrgizgen arnaiy operatsiia barysynda sintetikalyq esirtki óndirip, ony Eýropa men TMD elderine taratqan qylmystyq jeliniń qyzmeti toqtatyldy.
IIM Esirtki qylmysyna qarsy is-qimyl komiteti tóraǵasynyń orynbasary Eldar Ábdikenovtiń aitýynsha, Kievte ornalasqan call-ortalyqtar adamdardy esirtki biznesine tartý úshin paidalanylǵan. Ortalyq qyzmetkerleri Qazaqstan aýmaǵynda esirtki jasyrýshylar men oraýshylardy izdep, olardy zańsyz jumysqa qabyldaýmen ainalysqan.
Arnaiy operatsiia nátijesinde 11 adam ustaldy. Olardyń qatarynda uiymdastyrýshylar, operatorlar jáne kadr tartýmen ainalysqan tulǵalar bar.
Toǵyz mekenjaida júrgizilgen tintý barysynda shamamen 40 myń AQSh dollary, 10 myń eýro, Range Rover avtokóligi, 18 uialy telefon, sondai-aq 12 noýtbýk pen planshet tárkilendi.
Qazirgi ýaqytta quqyq qorǵaý organdary tárkilengen tehnikalardaǵy málimetterdi zerttep jatyr. Sonymen qatar qylmystyq top uiymdastyrýshylarynyń akkaýnttary anyqtalyp, qarjylyq tergeý júrgizilýde.
Vedomstvonyń málimetinshe, atalǵan call-ortalyqtardyń jabylýy Qazaqstan azamattaryn esirtki saýdasyna tartý faktilerin azaityp, halyqaralyq esirtki biznesin uiymdastyrýshylardy jaýapqa tartýǵa múmkindik beredi.
