Ýkraina qaýipsizdik qyzmetiniń qyzmetkerleri kievte Grýziianyń burynǵy prezidenti, "Jańa kúshter qozǵalysy" saiasi qozǵalysynyń jetekshisi Mihail Saakashvilidi tutqyndady, dep habarlaidy "Ult aqparat" Azattyqqa silteme jasap.
Saiasatkerge qandai aiyp taǵylǵany ázirge belgisiz. Radio Svobodanyń Kievtegi tilshisi Vladimir Ivahnenkonyń aitýynsha, Saakashvilidiń qolyna kisen salyp, páterinen shyǵarǵan. Ustaý kezinde Saakashvilidiń jaqtastary men arnaiy jasaq sarbazdary janjaldasyp qalǵan. Saakashvilidiń páteri ornalasqan úidi Ýkraina qaýipsizdik qyzmetiniń arnaiy jasaǵy men politsiia qorshaýǵa alǵan. Saakashvilidiń jaqtastary ol otyrǵan kóliktiń jolyn bógedi. Olar "Pozor!", "Misha!" jáne "Impichment!" dep urandap tur.
Budan buryn seisenbi kúni Ýkraina qaýipsizdik qyzmeti men bas prokýratýra Saakashvilidiń páterin tintýge barǵan. Saiasatker quqyq qorǵaý organdarynyń qyzmetkerlerinen jasyrynyp, úidiń shatyryna shyǵyp ketken. Saakashvilidiń advokaty men Joǵarǵy Radanyń depýttattary Iýrii Dereviannyi men Viktor Chýmakti úige kirgizbedi.
Ýkraina bas prokýrory Iýrii Lýtsenko Saakashvilidi ol jaqtastarymen birge 17 qazanda Joǵarǵy Rada aldyna shatyr tikken soń "memlekettik tóńkeris jasamaq boldy" dep aiyptaǵan. Parlament aldyndaǵy ol shatyrlarda júzdegen demonstrant áli turyp jatyr.
Demonstranttardyń depýtattarǵa qoiǵan talaptarynyń arasynda "Ýkraina prezidentine impichment jariialaý týraly" zań qabyldaý talaby da bar.
3 jeltoqsanda Kievte "Impichment úshin marshy" ótken. Oǵan birneshe myń demonstrant qatysqan. Sol kúni marshta sóilegen Saakashvili óz qozǵalysy ózge uiymdarmen birge Ýkrainanyń barlyq aimaǵynda impichment jariialaý jónindegi komitet quratynyn habarlap, Kievte 10 jeltoqsan kúni jańa aktsiia bolatynyn jariialaǵan. Saakashvili belsendiler bul kúni prezident ákimshiligin qorshaýy múmkin ekenin joqqa shyǵarmaǵan.
