Kibertehnika iadrolyq jáne ózge de strategiialyq nysandarǵa qaýip tóndiretin bolady. Bul týraly búgin elordada ótip jatqan Astana klýbynyń jalpy otyrysynda QR Prezidenti Nursultan Nazarbaev aitty, dep habarlaidy QazAqparat tilshisi.
Memleket basshysy jahandyq qaýipsizdikke halyqaralyq terrorizm men ekstremizm ses kórsetýin jalǵastyra beretindigin atap ótti. Terrorizmdi zerdeleý jáne terroizmge qarsy áreket konsortsiýmynyń deregine sáikes 1917 jyly álemde shamamen 10 myń terroristik akti oryn alyp, onda 26 myńnan astam adamnyń qaza tapqanyn eske saldy.
Sondai-aq, Qazaqstan Prezidenti kiberqaýipsizdik jahandyq turaqtylyqtyń múldem jańa ólshemine ainalatyndyǵyn basa aitty.
«Negizgi derjavalar arasyndaǵy teketires osy keńistikke qarai oiysady. Taiaý jyldary kibertehnikanyń kómegimen isten shyǵarylýy múmkin iadrolyq jáne ózge de strategiialyq nysandardyń qaýipsizdigi problemasynyń ózektiligi arta túsetin bolady. Qazirdiń ózinde oryn alǵan kiber shaýyldar álemdik jalpy ishki ónimniń 1 paiyzyna teń bolǵanyn aitýda», - dedi Nursultan Nazarbaev.
Aita keteiik, Elbasy jiyn barysynda Úlken Eýraziianyń sulbasy qalyptasyp kele jatqanyn aityp, Resei, AQSh jáne Qytai arasyndaǵy geosaiasi básekelestikke alańdaýshylyq tanytty.
Sonymen qatar Nursultan Nazarbaev álemdik derjavalar qarýlaný jarysyna qaita oralýy múmkin ekendigin eskertti.
