QR Bilim jáne ǵylym ministri Ashat Aimaǵambetov mektep oqýshylaryna qosymsha bilim berý týraly aitty, dep habarlaidy QazAqparat.
«Biyl biz qosymsha bilim berýdi damytýdyń tujyrymdamalyq negizin bekittik. Damý jospary bar. Ótken jyly Petropavlda oqýshylar saraiy ashyldy, qazir Qaraǵandy, Kókshetaý jáne basqa da kóptegen qalalarda úlken oqýshylar sarailarynyń qurylysy bastaldy», - dedi Ashat Aimaǵambetov.
Bul oqýshylar sarailarynyń balalarǵa bereri kóp.
«Oqýshylar saraiyndaǵy jas natýralister, jas tehnikter, óner jáne mýzyka úiirmeleri oqýshylarǵa arnalǵan. Munda kelýge eshkimdi májbúrlemeidi, munda reiting joq. Desek te bizdiń barlyq oqýshylar sarailary men qosymsha bilim berý uiymdary balalarǵa lyq toly. Kezekke turǵandar sany da aitarlyqtai. Bul taǵy da bizdiń jumysymyzdyń mańyzdylyǵyn kórsetedi. Biraq meni bir nárse mazalaidy. Statistikany qaradym. Elimiz boiynsha 2019 jyldyń birinshi qańtarynda 1303 qosymsha bilim berý uiymy bolǵan. Qazir 1262-si qalypty, bul - alańdatarlyq jáit. Bilim bóliminiń keibir basshylary, ókinishke orai, ońtailandyrý máselelerin sheship aldy. Orta bilim salasyndaǵy uiymdardy, ásirese qosymsha bilim berý uiymdaryn ońtailandyrý qajet dep aitylǵan joq», - dedi Ashat Aimaǵambetov.
Sondai-aq, ol qosymsha bilim balalarǵa qajetti daǵdylardy igerýge yqpal etetinin jetkizdi.
«Biz úshin bul baǵdarlamany ázirleý jáne qoldaý óte mańyzdy. Robototehnikany damytý qajet. Biz buǵan kóp kúsh jumsaimyz. IT-mektepter ashamyz. Sonymen qatar, basqa baǵyttardy eskerý kerek. Bul týristik jáne ólketaný baǵyttary, mýzyka, sýret mektepteri, jas tehnikter sektsiiasy, jas natýralister jáne basqalar. Jalpy, ár túrli salalardy damytý kerek. Sport bul búgingi kúnniń ajyramas bóligi ekenin túsinýimiz kerek. Biz oiyn alańdary arqyly bilim berýdi damytýymyz kerek. Bul úshin bizde úilestirý keńesi bar jáne biz bul jumysty jandandyramyz», - dedi ministr.
Aita ketý kerek, búgin QR Bilim jáne ǵylym ministri «Ǵalamdyq qundylyqtar jáne Qazaqstan bilimi men ǵylymynyń sapasy» atty respýblikalyq forým aiasynda «Balalarǵa qosymsha bilim berý: memlekettik bilim berý saiasatynyń jańa mindetteri men vektorlary» sektsiiasyna qatysty.
