Jelide Talǵardaǵy 16 jastaǵy Sherzat Bolattyń ólimine kúdiktilerdiń basshysy delingen Hasan Qasymbaev úndeý jasady, dep habarlaidy El.kz aqparat agenttigi.
Ol bul iske eshqandai qatysy joǵyn, jalǵan aqparat tarap jatqanyn aitady.
"Qurmetti qazaq eli! Birneshe kúnnen beri áleýmettik jelide tarap jatqan aqparattaǵy Qasymbaev Hasan degen men bolamyn. Talǵarda bolǵan qaiǵyly oqiǵa, Sherzat degen balanyń qazasyna, týǵan-týysqandaryna, áke-sheshesine qaiǵyryp kóńil aitamyn. Árine, qiyn. Eshqaisymyzdyń basymyzǵa bermesin. Men de bala tárbielep otyrǵan ákemin. Qansha kúnnen beri uiqy joq. Jalǵan aqparat meniń jáne otbasymnyń mazasyn qashyrdy", – dedi Hasan Qasymbaev.
Ol eshqandai qylmystyq topqa qatysy joq ekenin málimdep otyr.
"Banda, OPG dep jatyr ondaiǵa qatysym joq. Zań aldynda eshqandai másele bolmaǵan, sottalmaǵanmyn. Árine, inisi sottalǵan dep aityp jatyr. Inim 2017 jyldan beri jazasyn ótep jatyr. Jalǵan aqparat taratpaýlaryńyzdy ótinip suraimyn. Advokat jaldadym, jalǵan aqparat taratqan tulǵalardyń bárin zań boiynsha jaýap berýin suraimyn. Men týraly aitylyp jatqan aqparat kóp, zań boiynsha aryzdaryn jazsyn", – dedi ol úndeýinde.
Ol qylmyskerler ustalyp, zań boiynsha jazalaryn alatynyna senimdimin.
Buǵan deiin Talǵar aýdanynda úidi órteý qylmysy boiynsha barlyq aiǵaqtar alynyp, qajetti saraptamalar júrgizilip jatqanyn jazǵan bolatynbyz.
