Áleýmettik jeliden baiqap otyrmyz. Jurttyń kóbi teginiń túbine "ICh" jalǵapty. Óitpese qazaq bola ma. Úp etken jańalyqty ózimdiki dep tanyp, ońai oljany maldaný múlde jaqsy qasiet te shyǵar. «Oqjetpestiń» oiynyn kórmeitinder «Hala, Real» dep ózinshe áýe jaiylyp, «Qyranǵa» kózin salmaityndar «Barselona» bairaǵyn bosaǵasyna súiep qoisa, «e, elimiz órkeniet kóshine ergen shyǵar», - dep qana oilaimyz... Eger, erinbesek...
Horvatiianyń finalǵa shyǵýy – taza erlik! Oń qoldy júrek tusyna aparyp, qurmet kórsetýge turatyn! Bapkeriń Zlatko Dalich sekildi, qazir. Domogaiyn da, ózgelerin de jýsatyp, órgizetin. Júzi jyly. Aqyly álpetine kórik berip tur. Qazaq bolsa, imanjúzdige balaýshy edik. Elin jaqsy kóredi. Óte jaqsy kóredi. Patriot deýshi ma edik. Dalich qyp-qyzyl patriottyń ózi! Komanda qairaǵy! Qalai qairaidy! Soǵys kórgen, namysty órgen urpaqty qairap-qairap komanda jasap aldy da, endi jolyqqanyn uryp, jyǵyp júr. Jigit! «Chiro» sekildi. Miroslav Blajevich deýshi edik qoi.
Jairatyp, fýtbol oinamasa da, kez kelgen matchty jainatyp jiberetin qarym bar. Ony bildik. Saýattylyq degen túsinik bar. Búgingi Horvatiia fýtboldy barynsha saýatty oinap júr. Olarda buǵan deiin de fýtbol iia, fýtbolshylar boldy. Davor Shýkerdiń ózi nege turady. Robert Iarni unaýshy edi. Niko Kranchar da este. Qaisy birin tústeiik. Ózindik mektebi bar ólke.
Qazaq eliniń mundai biikke shyǵar shamasy bar ma? Iekti qolmen saýyp otyryp, san oilanǵan sátter bar. Jaýabyn izdep she. Tabylady da, taban astynda ǵaiyp bolady. Ol úshin kóp is tyndyrý kerek.
Aldymen, anaý legioner degen báleden arylǵan jón. Bapker tasyǵandy da toqtata alsaq. Sodan shyǵatyn múiiz bolsa, ustap kórýge keletin zaman ótti ǵoi.
Ol da emes. Óz fýtbolymyzdy túzeýge nietti kisi kerek. Ár óńirde. Ákimder fýtbol ámirshisi atanýdan jalyqsa shirkin... bólingen qomaqty qarjy sol aiaqdopty óristetýge ǵana arnalsa.. áitpese sharshatty... bitpeitin qaryzdar.. sizderdi qaidam, ana komanda munsha qaryz eken degendi estigende ornymyzdan atyp turamyz... táp bir sonsha teńgeni ózimiz joǵaltyp alǵandai... ertigige ózek syltaýlar.... bálenbai milllion qaryz.. Jáne kimge deisiz ǵoi. Syrttan kelgenderge... Bir kiltipannyń bar ras qoi... Kiltipan kilti ashylǵansha omalyp otyrǵanymyz, otyrǵan.
Jibi túzý baǵdarlama bar edi. Sársenbek Keljanov pen Baýyrjan Sárskenov syndy aǵalarda. Ekeýi de o dúnielik. Josparlary júzege aspady. Negizi óte saýatty jazylǵan.. ony júzege asyrýǵa eshkim asyqpady.
Birdi aityp, birge ketemiz.. bálkim birdeńe biletindikten.. bálkim dym túsinbeitindikten.. Nadandyqtyń da belgisi shyǵar, túsiniktiń tarlyǵy degendei...
Bir ókinish. Nemese ... bul - ókinish... Qoldan keletin sharýany retteýge múmkindiktiń joqtǵy... Aitylar, qalar... Kimniń qulaǵyna syrǵa bolyp, taǵylsyn... Kim taqtyrady, á?
Bir úmit... Áli de býyn aýysqan shaqta álgi bir josparlar júzege asatyn bolar... Úmitten kúder úzýge bolmaidy ǵoi.. Qandai ediń, el fýtboly.. Ár óńirdiń óz komandasy boldy.. ár komanda sapynda óz jigitterimiz óner kórsetti... eshkimnen kem oinamaityn... óńir basshylary keń oilaityn...
«Gorniagyń» qaida, Hromtaý? «Bolatyń» qaida, Temirtaý? «Lashynyń» qaida, Qarataý? "Ileń" qaida, Ótegen batyr aýyly? «Aqbulaǵyń», qaida Talǵar? «Suńqaryń» qaida, Qaskeleń? Suńqyldaǵan qart jankúierdi kórdik.. «Halany» qara dep túsinbeitin... «Ile-Sáýletti» ǵana qabyldaityn... Ol eski adam. ICh-ti de tegine «tegtep» almaityn... Ony eshkim túsinbeidi...
Álemdik fýtbol daǵdarysqa tap bolǵan myna zamanda Baian Badaǵulov, Talǵat Baisýfinov, Tileýhan Turmaǵambetov, Marat Esmuratov, Ǵani Qainazarov, Asqar Qojabergenov deńgeiles oiynshylarmen de talai sharýany sheship alar edik... olardyń izbasarlary da kóp edi ǵoi...
Elińde jiyrma shaqty ǵana komandań qaldy... Elińde legionerler tolyp júr.. Olardyń agentteri qazynańdy toryp júr.. fýtbolshy ákimder álgi fýtbolshylar men agentterdiń «jemi» bolyp júr... Jolyń bolsyn, bizdiń fýtbol... Seniń baǵyńa da bireý týdy ma eken, osy?
Amangeldi Seiithan
.jpg)