Qurlyqtyq hokkei ligasy aiasynda «Barys» búgin, 21 aqpanda elordada Reseidiń «Sibir» (Novosibir) komandasymen kezdesti, dep habarlaidy "Ult aqparat".
Eki komanda buǵan deiin biylǵy týrnirde úsh márte kezdesti. Onyń ekeýinde «Sibir» klýbynyń mereii ústem boldy.
Taǵy bir aita keterligi, komandalar buǵan deiin 40 márte sheberlik baiqasty. Onyń on toǵyzynda «Barys» basymdyq tanytsa, qalǵanynda «Sibirdiń» mereii ústem boldy.
Búgingi kezdesýdiń birinshi kezeńinde eki klýb ta bir-biriniń qaqpasynan sańylaý taba alǵan joq. Ekinshi kezeńde reseilik hokkeishiler belsendilik tanytyp, «Barys» qaqpasyna qatarynan úsh shaiba soǵyp ketti. Aldymen Vladislav Ýshenin 23, 30 minýttarda mergendik tanytsa, Dmitrii Saiýstov 32-minýtta esepti ústemelei tústi. Budan keiin «Barys» qaqpashysy Henrik Karlsson óziniń ornyn áriptesi Denis Karataevqa bosatyp berdi.
«Sibir» sapynan Oleg Li 51, Danil Romantsev 55-minýttarda taǵy eki shaibanyń avtory atandy. Oǵan «Barys» hokkeishisi Nikita Mihailis 55-minýtta jalǵyz shaibamen jaýap qaiyrdy. Osylaisha elordalyq klýb qarsylasyna 1:5 esebimen ese jiberdi.
Endi «Barys» úsh oiyndy syrt aidynda ótkizedi. Aldymen 23 aqpanda «Ak Bars» (Resei) komandasymen kezdesse, Qytaidyń «Kýnlýn Red Star» (Qytai) klýbymen 25, «Avangard» (Resei) 27 aqpan kúnderi sheberlik baiqasady.
