قۇرلىقتىق حوككەي ليگاسى اياسىندا «بارىس» بٷگٸن, 21 اقپاندا ەلوردادا رەسەيدٸڭ «سيبير» (نوۆوسٸبٸر) كومانداسىمەن كەزدەستٸ, دەپ حابارلايدى "ۇلت اقپارات".
ەكٸ كوماندا بۇعان دەيٸن بيىلعى تۋرنيردە ٷش مەرتە كەزدەستٸ. ونىڭ ەكەۋٸندە «سيبير» كلۋبىنىڭ مەرەيٸ ٷستەم بولدى.
تاعى بٸر ايتا كەتەرلٸگٸ, كوماندالار بۇعان دەيٸن 40 مەرتە شەبەرلٸك بايقاستى. ونىڭ ون توعىزىندا «بارىس» باسىمدىق تانىتسا, قالعانىندا «سيبيردٸڭ» مەرەيٸ ٷستەم بولدى.
بٷگٸنگٸ كەزدەسۋدٸڭ بٸرٸنشٸ كەزەڭٸندە ەكٸ كلۋب تا بٸر-بٸرٸنٸڭ قاقپاسىنان ساڭىلاۋ تابا العان جوق. ەكٸنشٸ كەزەڭدە رەسەيلٸك حوككەيشٸلەر بەلسەندٸلٸك تانىتىپ, «بارىس» قاقپاسىنا قاتارىنان ٷش شايبا سوعىپ كەتتٸ. الدىمەن ۆلاديسلاۆ ۋشەنين 23, 30 مينۋتتاردا مەرگەندٸك تانىتسا, دميتريي سايۋستوۆ 32-مينۋتتا ەسەپتٸ ٷستەمەلەي تٷستٸ. بۇدان كەيٸن «بارىس» قاقپاشىسى حەنريك كارلسسون ٶزٸنٸڭ ورنىن ەرٸپتەسٸ دەنيس كاراتاەۆقا بوساتىپ بەردٸ.
«سيبير» ساپىنان ولەگ لي 51, دانيل رومانتسەۆ 55-مينۋتتاردا تاعى ەكٸ شايبانىڭ اۆتورى اتاندى. وعان «بارىس» حوككەيشٸسٸ نيكيتا ميحايليس 55-مينۋتتا جالعىز شايبامەن جاۋاپ قايىردى. وسىلايشا ەلوردالىق كلۋب قارسىلاسىنا 1:5 ەسەبٸمەن ەسە جٸبەردٸ.
ەندٸ «بارىس» ٷش ويىندى سىرت ايدىندا ٶتكٸزەدٸ. الدىمەن 23 اقپاندا «اك بارس» (رەسەي) كومانداسىمەن كەزدەسسە, قىتايدىڭ «كۋنلۋن رەد ستار» (قىتاي) كلۋبىمەن 25, «اۆانگارد» (رەسەي) 27 اقپان كٷندەرٸ شەبەرلٸك بايقاسادى.
