Qurlyqtyq hokkei ligasynyń plei-off satysynda elordalyq «Barys» búgin, 12 naýryzda Reseide «Metallýrg» (Magnitogorsk) komandasymen altynshy oiyn ótkizdi, dep habarlaidy "Ult aqparat".
Esterińizge sala ketelik, jeńister seriiasy boiynsha «Metallýrg» 3:2 esebimen alda turǵan bolatyn. Búgin «Metallýrg» jeńiske jetken jaǵdaida shyǵys konferentsiiasynda jartylai finalǵa joldama alatyn edi. Al elordalyq klýb basym tússe, oiyndar seriiasy taǵy bir kezdesýge sozylatyn.
Birinshi kezeńde eki komanda bir-biriniń qaqpasynan sańylaý taba alǵan joq. Al ekinshi kezeńde komandalar shabýyl shebinen kóbirek boi kórsetti.
Aldymen «Metallýrg» sapynan Semion Koshelev 25-minýtta esep ashty. Odan keiin «Barys» hokkeishisi Linýs Viddel tarazy basyn teńestirdi. Al 36-minýtta Dennis Rasmýssen qaitadan reseilik klýbty alǵa shyǵardy. Qazaqstandyq Nikita Mihailis 39-minýtta mergendik tanytty. Esep 2:2.
Úshinshi kezeńde reseilik Sergei Moziakin – 45, Teilor Bek 54-minýttarda gol soǵyp, esepti ulǵaita tústi. «Barys» hokkeishisi Kirill Paniýkov 57-minýtta esep aiyrmasyn qysqartty. «Metallýrg» sapynan 58-minýtta Sergei Plotnikov qorytyndy esepti belgiledi. Osylaisha elordalyq komanda qarsylasyna 2:5 esebimen ese jiberdi.
Reseilik klýb jeńister seriiasynda osylaisha 4:2 esebimen jeńiske jetti. Nátijesinde jartylai finalǵa joldama aldy.
Qazirgi ýaqytta 1/2 finalǵa alty komanda shyqty. Olardyń qatarynda TsSKA, «Lokomotiv», SKA, «Dinamo», «Ak Bars», «Salavat Iýlaev», «Avangard» klýbtary bar.
