HQKO-ǵa barmai-aq turatyn jeri boiynsha tirkeýge turýǵa jáne odan shyǵýǵa bolady. Bul týraly Ishki ister ministriniń orynbasary Erlan Týrgýmbaev aitty, - dep habarlaidy "Ult aqparat" Qazaqstan Respýblikasy IIM Baspasóz qyzmetine silteme jasap.
Ishki ister ministriniń orynbasary Erlan Týrgýmbaev halyqqa memlekettik qyzmet kórsetýdiń sapasyn jaqsartý boiynsha IIM júieli sharalar qabyldap otyrǵanyn atap ótti.
"Búgingi kúni Ministrlik memlekettik qyzmettiń 39 túrin kórsetedi, vedomstvonyń qyzmetkerleri 286 halyqqa qyzmet kórsetý ortalyǵynda jáne 14 arnaiy halyqqqa qyzmet kórsetý ortalyǵynda jumys istep jatyr.
2017 jyldyń 10 aiy ishinde azamattarǵa 19 million 742 myńnan astam qyzmet kórsetildi, onyń basym kópshiligi - mekenjai anyqtamalaryn berý, avtokólikterdi tirkeý, halyqty qujattandyrý jáne azamattardy turǵylyqty jáne ýaqytsha turý oryndaryna tirkeý.
Memlekettik qyzmet kórsetýdi jeńildetý jáne protsesterdi jyldamdatý úshin IIM olardy elektrondyq úkimet portaly arqyly avtomattandyrýdy belsendi engizýde.
Sonymen qatar 2017 jyldyń basynda HQKO-na barmai-aq onlain rejimde "elektrondyq úkimet" portaly arqyly ýaqytsha tirkeý júrgizý múmkindigi týdy.
Aǵymdaǵy jylǵy 1 qarashadan bastap ýaqytsha jáne turaqty tirkeý kezinde turǵyn úige menshik quqyǵy týraly 2-nysandy anyqtamany talap etý joiyldy (tek 25 kún ishinde 138 myń adam tirkeýge turdi, onyń ishinde 115 myń adam - turaqty tirkeýge jáne 23 myń adam ýaqytsha turatyn orny boiynsha tirkeldi).
Sondai-aq qazirgi ýaqytta HQKO-na barmai-aq elektrondyq úkimet portaly arqyly turaqty tirkeýge turý jáne azamattardy tirkeýden shyǵarý mehanizmi pysyqtaldy, ony 2018 jyly iske qosý josparlandy, - dep atap kórsetti ministrdiń orynbasary Týrgýmbaev.
Aqparat jáne kommýnikatsiialar, Ádilet, Ishki ister ministrlikteriniń aqparattyq júiesin biriktirý negizinde "Elektrondyq úi kitapshasy" jasalyndy, ol árbir eldi meken boiynsha halyqtyń kóship-qonýyna monitoring júrgizýdi jaqsartady, úidiń iesine onyń menshiginde tirkeýge turǵan adamdar týraly málimet alýǵa múmkindik beredi.
Aita keteiik, Turǵylyqty jeri jáne ýaqytsha kelý orny boiynsha tirkelgenderdiń sany 2016 jylmen (1,4 million) salystyrǵanda 2017 jyldyń (2,9 million) basynan bastap 2 esege kóbeidi.
