Qyzdary oramal taǵyp, hidjab kietin ata-analar demeýshi taýyp, jeke mektep asha alady. Bul týraly din isteri jáne azamattyq qoǵam ministri Nurlan Ermekbaev aitty, dep habarlaidy "Ult aqparat" Sputnik Qazaqstan agenttigine silteme jasap.
"Bizde medreseler bar, medrese degen arnaiy dini bilim berý mekemesi. Biraq qalǵan bilim berý júiesi dinnen bólingen. Ol barlyq zańdarda jazylǵan nárse. Biraq qazirgi tańda zań uldar men qyzdar bólek oqityn jekemenshik orta bilim mekemesin ashýǵa múmkindik beredi. Ázirge bul másele zerttelip jatyr. Bizdiń azamattar buǵan qanshalyqty daiyn, osyny anyqtap alýymyz kerek. Alaida bul mektepter bilim jáne ǵylym ministrliginiń sertifikatyn alǵan, dinnen bólingen mektepter bolady. Sáikesinshe mundai bólek mektepterde qyzdar oramalsyz júre alady. Eger múlde oramal taqpai, hidjabsyz júre almasa, onda ata-analar birigip, demeýshi taýyp, jeke mektep asha alady, buǵan quqyqtary bar", — dedi Ermekbaev úkimet otyrysynan keiin.
Osy oraida ministr Aqtóbede mektep mańynda namaz oqyǵan áielderdiń áreketine qatysty túsinikteme berdi. Aitýynsha, olarmen túsindirý jumystary júrgiziledi.
"Kez kelgen jerde namaz oqý - Qurannyń da, shariǵattyń da talaptaryna sáikes kelmeidi. Zańda dini rásimder, qulshylyq etý arnaiy oryndarda jasalý kerektigi aiqyn kórsetilgen. Aqtóbedegi 3-4 áielmen túsindirý jumystary júrgiziledi. Meniń oiymsha, kóshede namaz oqý - bul durys emes", — dedi ministr.
