Astanadaǵy "Haivill" turǵyn úi keshenindegi órtten Nazarbaev Ýniversitetiniń Meditsina mektebiniń professory qaza tapqan, - dep habarlaidy "Ult aqparat" JOO-nyń baspasóz qyzmetine silteme jasap.
"Nazarbaev Ýniversitetiniń Meditsina mektebiniń professory Kehinde Ilaidja (Nigeriia) men onyń otbasynyń (áieli - Fýnmi Kehinde (Ulybritaniia) jáne eki qyzy Modjoin Kehinde (18 jas) men Greis Kehinde (8 jas) qaza bolǵanyn qaiǵymen habarlaimyz", - delingen taralǵan habarlamada.
Ýniversitet ókilderiniń aitýynsha, Kehinde Ilaidja Nazarbaev Ýniversitetiniń Meditsina mektebinde 2016 jyldyń maýsymynan beri jumys istegen. Ol Ulybritaniiadaǵy Lester ýniversitetinde meditsina doktory dárejesin alǵan jáne Nigeriia, Oman, Kýveit jáne Ulybritaniia elderinde meditsina salasynda 40 jyldan asa ǵylymi-zertteý men muǵalim qyzmetin atqarǵan.
Osy jyldar boiynda ol jeti ǵylymi-zertteý grantynyń iegeri bolǵan. "Nazarbaev Ýniversitetiniń basshylyǵy men ujymy orny tolmas qazaǵa bailanysty professordyń týystaryna, dostaryna jáne jaqyndaryna kóńil aitady", - delingen JOO habarlamasynda.
Eske salaiyq, búgin Astanadaǵy "Haivill" turǵyn úi kesheninde bolǵan órtten tórt adam qaza tapqan bolatyn. 2017 jyly 14 shildede tańǵy 05:06-da 24-shi qabatty "Haivill" turǵyn úi kesheniniń toǵyzynshy qabatynda tútin shyqqany jaily habarlama tústi. "65 sharshy metrlik jalpy kólemde jihaz , turmystyq tehnika jáne úi zattary órtengen. Órt saldarynan shyqqan gaz iisinen tórt adam qaza tapty, onyń ekeýi balalar", - dedi TJ Komitetindegiler.
Oqiǵa ornyna biik ǵimarattardaǵy órtti sóndirýge arnalǵan arnaiy tehnika men jeke quramnyń 25 adamy tartylǵan. Mamandar órttiń neden shyqqanyn anyqtap jatyr.
