Qazaqstandyq «Hassaq» ansambli túriktiń «Uly seljuqtar» serialynyń mýzykasyn oryndap, eki eldiń shyǵarmashylyq bailanysynyń tyń tynysyn ashyp otyr. Túrik rejisseri Emre Koniýk etno-folklorlyq ansambldiń birneshe shyǵarmasyn tyńdap, top múshelerimen seriktese jumys júrgizýge niet bildirgen, dep habarlaidy "Ult aqparat".
Jelide taraǵan bul aqparattyń izimen Qurmanǵazy atyndaǵy qazaq ulttyq konservatoriiasynyń Halyq mýzykasy fakýltetiniń dekany, «Hassaq» ansambliniń jetekshisi Erjan Jamankeevti áńgimege tartyp kórgen edik. Toptyń jetekshisi 2016 jyly «Amanat» atty beinebaian shyqqannan keiin Qazaqstanmen qatar, shet elderde aýditoriialary óse bastaǵanyn aitady.
«Ásirese Túrkiiada tyńdarmandarymyz arta tústi. Bizdi ol jaqta «Hassaq qashan keledi eken» dep kútip júrgender kóp. Sol aýditoriiamyzdyń arqasynda Túrkiiadaǵy mýzykanttar men kinorejisserlar da bizdi tani bastady. Buǵan deiin kinorejisserlerdiń biri «Amanat» kompozitsiiasyn tarihi serialdardyń birine qoldansaq dep qolqa salǵan edi», - deidi telefon arqyly áńgimelesken Erjan Jamankeev.
Onyń aitýynsha Túrkiiadaǵy qalyń tyńdarmanmen birge kinorejisserler de, prodiýsserler de qazaqtyń ulttyq án-kúiine erekshe nazar aýdara bastaǵan. Kinolarǵa mýzyka jazatyn Kerdar esimdi mýzykantpen birigip, «Hassaq» toby seljuqtar týraly tarihi serialǵa arnap bir mýzykany jazǵan eken. Odan bólek túrik rejisseri eki albomdaǵy toǵyz shyǵarmany alýdy ótingen.
«Biz avtorlyq ruqsatty berdik. «Uyanys: buyuk selcuklu» («Oianý: uly seljuqtar») serialy tórt jyldyq joba eken. Aldaǵy ýaqytta biz ózimizdiń úshinshi albomymyzdy shyǵaramyz. Endi olar sol albomdaǵy týyndylardy surap otyr. Úshinshi albomymyzdyń alǵashqy shyǵarmasyn jiberip qoidyq. Endi ekeýin joldaimyz», - deidi top jetekshisi.
«Uyanys: buyuk selcuklu» serialy seljuqtardyń (túrki-oǵyz áskeriniń sol qanatyn quraǵan qynyq taipasynan shyqqan áýlet) tarihynan syr shertedi. Týyndyda seljuqtardyń soǵysý taktikasy, túrik halqyna ákelgen jeńisteri baiandalady.
«Biz «Hassaq» toby kúnine 10-11 saǵatqa deiin daiyndyq jumystaryn júrgizemiz. Keide túnge deiin otyryp qalamyz. Alaida osy eńbektiń jemisin kórip otyrmyz deýge ábden negiz bar. Ónerge baryńmen berilseń – eńbegiń aqtalady. Keibir shyǵarmalar 6 repititsiiadan keiin daiyn bolýy múmkin. Eń jyldam jazyp shyqqan shyǵarmamyz – 3 repititsiiada daiyn bolǵan týyndy. Orta eseppen 10-11 repititsiiadan bir shyǵarma jaryqqa shyǵady», - degen Erjan Jamankeev toptyń tarihy jaily da aityp ótti.
Jalpy «Hassaq» toby 2013 jyldyń 1 aqpanynda qurylǵan. Úsh beinebaian, 11-12 shyǵarmadan turatyn eki taspasy bar. Top quramyndaǵy ónerpazdar – besaspaptar, iaǵni mýltiinstrýmentalister. Bir shyǵarma ishinde top músheleri birneshe aspapty oinaidy. Arasynda qazaqtyń ulttyq 30 aspabyna deiin oinaityn mýzykanttar bar eken.
«Biz kóbinese sheteldemiz. 2019-2020 jyldary ǵana Qazaqstannyń qalalaryna shyǵa bastadyq. Qytai men Reseiden, Eýropa elderinen kóp shaqyrtý túsedi», - dep túidi Erjan Jamankeev.
