Foto: videodan skrinshot
Almaty oblysy Talǵar aýdandyq sotynda buqaralyq aqparat quraldary «Hýtorskie» UQT jetekshisi dep ataityn Hasan Qasymbaevqa úkim shyǵaryldy, dep habarlaidy Ult.kz Tengrinews.kz tilshisine silteme jasap.
Sot Hasan Qasymbaevty adam urlaý, densaýlyqqa qasaqana aýyr ziian keltirý jáne qorqytyp aqsha alý baptary boiynsha kináli dep tanydy. Aiyptardyń jiyntyǵy boiynsha oǵan 12 jyl bas bostandyǵynan aiyrý jazasy taǵaiyndaldy. Jazasyn ol orta qaýipsizdik mekemesinde óteidi.
Odan bólek, is boiynsha taǵy bes aiyptalýshy boldy. Olarǵa da dál osy baptar boiynsha 8 jyldan 22 jylǵa deiin bas bostandyǵynan aiyrý jazasy kesildi.
Olarǵa taǵaiyndalǵan jazalar:
-
R. A. – 20 jyl;
-
S. A. – 8,5 jyl;
-
M. K. – 12 jyl;
-
D. A. – 8 jyl;
-
N. S. – 22 jyl.
Sońǵy sózinde Qasymbaev óz kinásizdigin aityp, istiń qoldan jasalǵanyn málimdedi. Ol qylmys quramynyń joqtyǵyna bailanysty ózin aqtaýdy surady. Alaida sot aiyptalýshynyń ýájderin negizsiz dep tapty.
Buǵan deiin prokýror Erlan Qulanbaev Qasymbaevqa 15 jyl bas bostandyǵynan aiyrýdy, al qalǵan aiyptalýshylarǵa 9 jyldan 22 jylǵa deiin jaza taǵaiyndaýdy suraǵan bolatyn.
Is materialdaryna sáikes, 2021 jyldyń jazynda aiyptalýshylar Talǵarda jekpe-jek jattyqtyrýshysy ári sportshy Arman Álimovke shabýyl jasap, uryp-soǵyp, ony Kendala aýylynyń syrtyna aparǵan. Aiyp boiynsha, buǵan Álimovtiń «Qasymbaev men úshin bedel emes» degen sózi sebep bolǵan. Muny estigen Hasan Qasymbaev ony «jazalaýdy» oilap, janyndaǵylardy iske tartqan.
2021 jyly osy oqiǵa boiynsha úsh kúdikti – S. A., D. A. jáne M. K. – buzaqylyq deregimen sottalǵan. Keiin is qaita qaralyp, taǵy eki kúdikti – R. A. jáne N. S. – qosyldy. 2024 jyly bes aiyptalýshyǵa úkim shyqty. 2024 jyldyń qarashasynda jańadan ashylǵan mán-jailarǵa bailanysty is qaita jandanyp, altynshy figýrant – Hasan Qasymbaev istiń quramyna engizildi.
Taǵy bir epizod – qorqytyp aqsha alý faktisi. Qasymbaev pen onyń serikteri kásipker Áripjan Tájievten dárihanasynyń jumysy úshin aqsha talap etken. Jábirlenýshini esinen tanǵansha uryp, bir million teńge berýdi talap etken.
Talǵar turǵyndary Qasymbaevty «Hýtorskie» UQT jetekshisi dep ataidy. Onyń aty 16 jastaǵy Sherzat Polatty (Bolatty) óltirý deregi jariia bolǵannan keiin jii atala bastady. Qoǵamda jasóspirimdi óltirdi degen kúdiktiler osy topqa qatysty degen boljamdar aityldy, tipti bul top qalany birneshe jyl boiy úreide ustap otyr degen pikirler boldy.
Alaida mundai qylmystyq toptyń bar ekeni dáleldenbedi. IIM men prokýratýra ókilderi bul aqparatty 2024 jyly-aq joqqa shyǵarǵan. Ishki ister ministriniń birinshi orynbasary Baýyrjan Álenov 2024 jyldyń qazanyndaǵy brifingte: «Bizde “Hýtorskie” degen OQQ resmi tirkeýde joq», – dep málimdegen.
Soǵan qaramastan, Qasymbaev 2024 jyldyń 5 qarashasynda qamaýǵa alyndy. Biraq oǵan UQT qurý jáne basqarý boiynsha aiyp resmi túrde taǵylǵan joq. Almaty oblysy prokýratýrasynyń málimetinshe, Qasymbaev pen basqa da figýranttarǵa qatysty tergeý 2025 jyldyń 28 naýryzynda aiaqtalǵan.
