Qazaqstan Respýblikasynyń Ýkrainadaǵy Tótenshe jáne Ókiletti Elshisi Darhan Káletaev Harkov qalalyq keńesiniń hatshysy Igor Terehovpen kezdesý ótkizdi, dep habarlaidy "Ult aqparat".
Issapar barysynda qalanyń ortalyq alańdarynyń birine uly Abaidyń eskertkishi ornatylatyny týraly ýaǵdalastyqqa qol jetkizildi.
Kezdesýde músinshi Seifaddin Kýrbanov eskertkishtiń jobasymen tanystyrdy.
Bul joba eskertkish-triptih túrinde jasalǵan. Músinshi bul eńbegin «Ómir aǵashy» dep atady.
Eskertkishtiń orta tusynda hakim Abai beinelengen.
Uly aqynnyń qos qaptalynda Ýkrainanyń halyq aqyny Grigorii Skovoroda men Ázirbaijannyń aǵartýshy, filosofy Myrza Fatali Ahýndovtyń keskinderi ádiptelgen.
Eskertkishtiń jalpy biiktigi – 4 metr. Gúlzardyń aýmaǵy – 2 543 sharshy metr.
Ol Harkovtegi halyq eń kóp júretin, demalys aimaǵyndaǵy kórneki jerde ornalasqan.
Tóńiregi sýburqaqtarmen qorshalyp, jasyl jelektermen kómkerilgen.
Darhan Amanuly óz kezeginde qala basshylyǵynyń igi bastamasyna rizashylyǵyn bildirip, eskertkish-triptihtiń baýyrlas, týysqan halyqtar arasyndaǵy rýhani bailanysty odan ári tereńdetip, olardyń mádenieti men ónerin keńinen tanýǵa, igerýge jáne ózara yntymaqtastyqty arttyrýǵa zor septigin tigizetinin tilge tiek etti.
«Bul eskertkishti bizdiń ýkrain baýyrlarymyzdyń qazaq halqyna, qazaq tarihy men rýhaniiatyna kórsetilgen sheksiz qurmeti retinde qabyl alamyz», - dedi elshi.
Osy oraida, sońǵy ýaqytta Qazaqstan men Ýkraina arasyndaǵy ekonomikalyq, mádeni bailanystardyń jańa sapaǵa kóterilip, erekshe qarqyn alǵanyn atap ótken jón.
