Foto: Baq.kz
Májilis depýtaty, burynǵy bilim ministri Ashat Aimaǵambetov Pavlodarda mekteptegi sabaq ýaqytyn 40 minýtqa qysqartý týraly bastamaǵa narazylyǵyn bildirdi, dep habarlaidy "Ult aqparat".
«Pavlodar oblysynyń basshylary sabaqtardy 30 minýtqa deiin qysqartýdy oilap tappaǵanyna shúkir. Bundai logikamen, endi jańa mektepter salmai-aq, tórt aýysymǵa kóship, milliardtaǵan qarajatty únemdeýge bolar edi. Shynyn aitqanda, Pavlodarda sabaqtardy qysqartý kóptegen suraqtar týǵyzady. Aimaqtarda sabaqtyń uzaqtyǵyn ózderi sheship, ákimdikke yńǵaily kez kelgen jaǵdaida onlain oqýǵa kóshetin bolsa, oqý protsesi múldem haosqa ainalady. Baǵdarlamalardyń mazmuny, bilim maqsattary ózgermei qalai sabaqty qysqartýǵa bolady? Bul bilim sapasyna jáne barlyq oqýshylarǵa sapaly bilim alý úshin teń jaǵdai jasaýǵa úlken problemalar týdyratyny anyq», - dedi eks-bilim ministri Aimaǵambetov.
Depýtattyń sózinshe, ár óńir óz bilgenimen sabaqtyń ýaqytyn qoiyp alatyn bolsa, birizdilik joiylady.
«Qyzyq paradoks: bir jaǵynan, el boiynsha biryńǵai ýaqyt beldeýi enip jatyr, al ekinshi jaǵynan — ár oblys sabaqtyń uzaqtyǵyn ózi sheshedi. Birizdilik qaida? Ǵylymǵa negizdelgen sheshim qaida?», - dep jazdy depýtat.
Aita ketsek, buǵan deiin Pavlodarda ekinshi aýysymda oqityn balalardyń sabaǵy keshki saǵat 19.30-ǵa deiin aiaqtalýy úshin sabaq ýaqyty 40 minýtqa qysqarǵany belgili bolǵan. Oblysty Asaiyn Baihanov basqaryp otyr.
