Batys Qazaqstan oblystyq Politsiia departamentiniń baspasóz qyzmeti Hankóldegi «sary qyzdyń» elesine qatysty júrgizilgen tekseris nátijesin málim etti, dep habarlaidy "Ult aqparat".
Qaratóbe aýdany Hankól aýylynyń turǵyndary áleýmettik jeli arqyly eldi meken mańynda «sary qyzdyń» elesi paida bolǵany jóninde aqparat taratqan bolatyn.
Osyǵan orai, oblystyq Politsiia departamenti basshysynyń tapsyrmasyna sáikes Qaratóbe aýdandyq politsiia bóliminiń qyzmetkerleri tekseris júrgizdi.
Aýylǵa baratyn barlyq joldar videoǵa túsirildi.
Anyqtalǵandai, eles qyzǵa bailanysty taralǵan videodaǵydai jol men aǵashtar atalǵan aýyl aýmaǵynda joq.
Sonymen qatar politsiia qyzmetkerleri aýyl turǵyndarymen kezdesip, saýalnama júrgizdi. Videoda kórsetilgen derekti eshqaisysy rastamady. Bári de mundai elesti kórmegenin, ózderin eshkim mazalamaǵanyn aitady.
Sondai-aq atalǵan videonyń Qazaqstanǵa esh qatysy joq ekendigi jóninde aqparat bar. Bul video 2019 jyly Reseidiń áleýmettik jelilerinde áldeneshe ret taralyp, onda túrli aimaqtar kórsetilgen.
Qaratóbe aýdany politsiia bóliminiń bastyǵy mindetin atqarýshy Maman Isaǵalievtiń aitýynsha, videonyń Hankól eldi mekenine esh qatysy joq. Ol osydan 11 ai buryn Youtube kanalyna Andreevich degen laqap esimmen júktelgeni anyqtaldy.
«Hankólden Samara-Shymkent kúre jolyna deiingi jol tekserildi. Jol jieginde tyǵyz ornalasqan tal-terektiń joqtyǵy da videonyń jalǵan ekendigin dáleldeidi. Sondyqtan aýdan jáne aýyl turǵyndarynan jalǵan aqparatqa senbeýdi jáne taratpaýdy ótinemiz», - dedi M.Isaǵaliev.
