Elordadaǵy «Han Shatyr» oiyn-saýyq ortalyǵynda 9 jastaǵy qyz bala sýǵa batyp ketti, dep habarlaidy "Ult aqparat".
Oqys oqiǵa oryn alǵanyn Nur-Sultan qalalyq politsiia departamentiniń baspasóz qyzmetinen rastady.
«Balanyń sýǵa batyp ketkenine qatysty QR Qylmystyq kodekstiń 141-baby (Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tiisinshe oryndamaý) boiynsha sotqa deiingi tergeý amaldary bastaldy. Sot-meditsinalyq saraptama jumystary taǵaiyndalyp, tergeý júrgizilip jatyr. Oqiǵanyń mán-jaiy anyqtalýda», - dep habarlaidy departamenttiń baspasóz qyzmetinen.
Nur-Sultan qalalyq bilim basqarmasy basshysynyń orynbasary Dýlat Jekebaev ta jaǵdaiǵa bailanysty túsinikteme berdi.
«Búgin oryn alǵan qaiǵyly oqiǵaǵa bailanysty birinshiden ata-anasyna, týǵan-týystaryna qaiǵylaryna ortaqtasyp, kóńil aitamyz. «Han Shatyrǵa» jazǵy saýyqtyrý lagerindegi mektep oqýshylary barǵan. Jylda «Han Shatyrǵa» balalar osylai baryp turady. Oǵan barǵanda mektep tarapynan, sonymen qatar «Han Shatyrdaǵy» nusqaýshylar tarapynan balanyń qaýipsizdigine bailanysty barlyq sharalar durys oryndalǵan. Qazir tergeý amaldary júrip jatyr», - dedi ol.
Basqarma basshysynyń orynbasary qaiǵyly oqiǵanyń qandai sebepterden oryn alǵandyǵyn qazir naqty aitý qiyn ekendigin atap ótti.
«Tergeý sharalary aiaqtalǵannan keiin osy oqiǵaǵa qatysty qosymsha aqparat habarlaityn bolamyz. Qaza bolǵan bala №10 mekteptiń 1 birinshi synyp oqýshysy. Jazǵy lagerge ata-anasynyń ótinishimen jazylǵan. Ata-analar balalaryn «Han Shatyrdaǵy» basseinge aparýdy ótingen. Basseinge balalardy mektep muǵalimderimen birge birneshe ata-ana da aparǵan, sonda bolǵan. Jalpy basseinge 200-dei bala barǵan», - dedi D.Jekebaev.
