QR Bilim jáne ǵylym ministri Kúlásh Shámshidinova elordadaǵy «Han Shatyr» saýda, oiyn-saýyq ortalyǵynyń basseininde mektep oqýshysynyń ólimine qatysty túsinik berdi, dep habarlaidy QazAqparat tilshisi.
«Keshe bizdiń qyzmetkerlerimiz oqiǵa ornynda boldy. Baqylaýda ustap otyrmyz. Adamdardyń jaýapkershiligi men qaýipsizdikti kúsheitý qajettigin aittyq. Sol jerde bolǵan kýágerlerdiń aitýynsha, bul jait óte jyldam, qysqa ǵana ýaqyttyń ishinde oryn alǵan», - dedi bilim ministri Úkimet otyrysynan keiin BAQ ókilderiniń saýalyna orai.
Sonymen qatar ol balalardy sýǵa júzýge úiretýdi uiymdastyrýǵa qatysty Bilim jáne Ishki ister ministrlikteriniń buiryǵy bar ekendigin eske saldy.
«Mundai jumys júrgizilip jatyr. Jazǵy lagerde jumys isteitin adamdarǵa qatysty aitar bolsam, árbir muǵalim balalar ómiriniń qaýipsizdigi úshin jaýapty. Sondyqtan olar oqýdan ótedi», - dedi ol.
Osy rette ministr atalǵan oqiǵaǵa bailanysty mektepter janyndaǵy lagerlerdiń jabylatyny týraly aqparattyń qańqý sóz ekendigin aitty.
«Mektep lagerleri burynǵy rejimde jumys istei beretin bolady. Qatańdatýǵa qatysty aitar bolsam, adamdardy jinap, taǵy bir márte ony qalai júrgizý kerektigin, buiryq bolýy tiistigin túsindirdik», - dedi K.Shámshidinova.
Osy oqiǵaǵa qatysty QR Ishki ister ministri Erlan Turǵymbaev ta pikir bildirip, qylmystyq is qozǵalǵanyn aitqan edi.
Eske salaiyq, 3 maýsym kúni «Han Shatyr» SOSO basseininde qyz bala sýǵa batyp ketti. Tergeý amaldary júrgizilip jatyr.
