Irannyń rýhani kósemi Aiatolla Áli Hamenei AQSh-taǵy prezident sailaýynyń qorytyndysy Tegerannyń Vashingtonǵa qatysty ustanymyna áser etpeidi dep málimdedi. Tegerandaǵy AQSh elshiligin basyp alǵan kún (1979 jyly 4 qarasha) men Muhammed paiǵambardyń týǵan kúnine bir kún qalǵanda memlekettik arnadan tikelei efirde sóilegen Hamenei "sailaýda kim jeńse de, Iran AQSh-qa qatysty uzaq jyldardan beri qalyptastyrǵan ustanymyn ózgertpeidi" dedi.
Osydan 30 jyldan astam ýaqyt buryn qarýly irandyqtar AQSh-tyń Tegerandaǵy elshiliginde diplomattardy kepildikke alyp, 444 kún ustaǵannan keiin keiin eki el arasynda diplomatiialyq qatynas úzilgen.
"Bizdiń AQSh-qa qatysty saiasatymyz aiqyndalǵan jáne jekelegen basshylardyń ózgerýi oǵan áser etpeidi. Bizge kimniń kelip, kimniń ketkeni mańyzdy emes" dedi Hamenei.
Iran biligi biyl AQSh elshiligin basyp alý kúnine orai uiymdastyrylǵan memlekettik sherýdi koronavirýsqa bailanysty keiinge shegergen. Elde resmi málimet boiynsha, koronavirýstan 36 myńnan astam adam qaitys bolǵan. Sońǵy aptada elde virýs juqtyrǵandar men odan qaitys bolǵandar kúrt kóbeigen.
Tramp 2015 jyly Aq úidiń Tegeran jáne birqatar alyp memlekettermen jasasqan halyqaralyq iadrolyq kelisiminen shyǵyp, ekonomikalyq sanktsiia salǵan. Shekteý sharasy Iran ekonomikasyn tejep, eldiń ulttyq valiýtasyn sergeldeńge túsirgen. Tegeran kelisimde kórsetilgen sharttardan birtindep bas tartqan. Osyǵan deiin Tramptyń sailaýdaǵy qarsylasy Baiden eger Tegeran kelisim sharttaryn túgel oryndaýǵa kelisse, qujatqa qaita qosylýǵa ýáde bergen.
