Qazaqstandyqtar birtindep dollardan ulttyq valiýtaǵa aýysyp keledi. QR Ulttyq bankiniń tóraǵasy Daniiar Aqyshev osylai málim etti, - dep xabarlaidy QazAqparat tilshisi.
«Halyqtyń teńgege degen senimi kúsheiip keledi. Máselen, qańtar-aqpan ailarynda teńgemen saqtalatyn depozitterdiń jalpy kólemi 0,3 paiyzǵa ósti. Al sheteldik valiýtanyń depozitteri 11,5 paiyzǵa azaidy», - dedi Aqyshev Úkimettiń búgingi otyrysynda.
Onyń sózine qaraǵanda, zańdy tulǵalardyń shetel valiýtasymen saqtap otyrǵan depozitteri 45,8 paiyzǵa deiin tómendese, jeke tulǵalardyń valiýtalyq depozitteri 58,8 paiyzǵa deiin tústi. «Al el ekonomikasyn nesielendirý máselesine keler bolsaq, biyl qańtar-aqpan ailarynda ótken jyldyń atalǵan kezeńimen salystyrǵanda, berilgen nesielerdiń kólemi 7,9 paiyzǵa ulǵaidy. Osy oraida zańdy tulǵalar úshin teńgemen berilgen nesie stavkasynyń 14,3 paiyzǵa tómendegenin atap ótken jón. Bul - 2015 jyldyń tamyzynan bergi eń tómengi stavka», - dep atap kórsetti bas bankir.
Aita keteiik, Úkimettiń búgingi otyrysynda elimizdiń áleýmettik-ekonomikalyq damýy boiynsha alǵashqy úsh aidyń qorytyndysy qaraldy. QR Ulttyq ekonomika ministri Timýr Súleimenovtyń aitýynsha, búginde xalyqtyń nesieni teńgemen kóptep ala bastaǵany baiqalady.
