Memleket basshysy Nursultan Nazarbaevtyń tóraǵalyǵymen Qaýipsizdik keńesiniń otyrysy ótti, - dep habarlaidy "Ult aqparat".
Kún tártibine sáikes jiynda elimizdegi qurylymdyq jáne institýtsionaldyq reformalardyń júzege asyrylý barysy jáne Soltústik Qazaqstan oblysynyń áleýmettik-ekonomikalyq ahýaly talqylandy.
Otyrysty ashqan Memleket basshysy 2008 jylǵy álemdik qarjy daǵdarysynyń saldaryna qaramastan, ekonomikalyq turaqtylyqty saqtaý úshin iske asyrylǵan sharalarǵa nazar aýdardy.
– Álemdik qarjy daǵdarysy bastalǵan sátten beri 10 jyl ótti. Jaǵdai ózgerdi. Daǵdarystan shyǵý úshin biz arnaiy baǵdarlamalar ázirledik, jol kartasyn qabyldadyq, jumystan bosap qalǵan adamdarǵa qol ushyn sozdyq. Kóptegen sharalar júzege asyryldy. Biz shetelden investitsiia tarttyq jáne óz qarjymyzdy da paidalandyq. Sol arqyly ulttyq ekonomikamyzdy quldyratpai daǵdarystan shyǵýǵa múmkindik aldyq, – dedi Qazaqstan Prezidenti.
Nursultan Nazarbaev jahandyq úrdister men qalyptasqan geosaiasi ahýaldy eskere otyryp, damýdyń jańa baǵdarlamalaryn ázirleý qajettigin aitty.
– Prezident Ákimshiligi men Úkimet odan ári damýymyzdyń joldaryn izdestirýi kerek. Biz bolashaqta tiisti sharalar qabyldaý úshin boljam jasaýymyz qajet. Bizdiń aldaǵy is-árketterimiz jóninde aiqyn ustanymymyz bolýǵa tiis, – dedi Memleket basshysy.
Qazaqstan Prezidenti qazirgi memlekettik jáne salalyq baǵdarlamalardy júzege asyrýdyń tiimdiligine toqtalyp, olardyń ýaqtyly jáne sapaly oryndalýynyń mańyzdylyǵyn atap ótti.
Nursultan Nazarbaev agroónerkásip sektoryn odan ári damytý jáne qaita óńdeý salasyna investitsiia tartý úshin tiisti sharalar qabyldaý qajettigine nazar aýdardy.
Elbasy memlekettik organdardyń qyzmeti el turǵyndarynyń ál-aýqatyn arttyrýǵa baǵyttalýy tiis ekenin aitty.
– Bizdiń búkil jumysymyz halyqtyń tabysyn arttyrýdy kózdeidi. Eger olai bolmasa, onda Úkimettiń shamasy kelmei otyr degen sóz, – dedi Qazaqstan Prezidenti.
Sonymen qatar, Nursultan Nazarbaev halyqty jumyspen qamtý, mindetti áleýmettik meditsinalyq saqtandyrý júiesin engizý, shaǵyn jáne orta biznesti qoldaý, jastarǵa kásibi bilim berip, jumysqa ornalastyrý máselelerine toqtaldy.
Jiyn barysynda Premer-Ministr B.Saǵyntaev, Ulttyq bank tóraǵasy D.Aqyshev, Bas prokýror Q.Qojamjarov jáne Soltústik Qazaqstan oblysynyń ákimi Q.Aqsaqalov baiandama jasady.
Basqosý qorytyndysy boiynsha Qazaqstan Prezidenti Úkimetke jáne basqa da múddeli memlekettik organdarǵa birqatar naqty tapsyrma berdi jáne olardyń oryndalýyn qadaǵalaýdy Prezident Ákimshiligi men Qaýipsizdik keńesiniń apparatyna tapsyrdy.
