Foto: elements.envato.com
Endi qazaqstandyqtardyń krediti memleket qarjysy esebinen keshirilmeidi. Bul týraly Qarjy naryǵyn retteý jáne damytý agenttiginiń tóraǵasy Mádina Ábilqasymova málimdedi, dep habarlaidy Sputnik Qazaqstan.
"Halyqtyń shamadan tys kredit alýyn azaitý" taqyrybyna arnalǵan parlamenttik tyńdaýdan keiin jýrnalister Ábilqasymovadan halyqtyń krediti keshirile me dep surady.
"Ókinishke qarai, 2019 jyly kredit keshirilgennen keiin qarjy sektorynda kredittiń kólemi qaitadan ósip ketti. Onyń ishinde problemalyq kreditter de kóbeidi. Sol sebepti biz memleket qarjysyn bólip, nesieni qaita-qaita keshire bersek, odan osyndai jańa kreditter paida bolady", - dep túsindirdi Ábilqasymova.
Ol halyqtyń shamadan tys qaryzyn azaitý úshin agenttik qandai sharalar qabyldaǵanyn aitty.
"Biz endi osy mindetti bankter men mikroqarjy uiymdaryna, kollektorlyq agenttikterge júktep qoiamyz. 2021 jyly tiisti zań qabyldanǵan bolatyn. Oǵan sáikes, bankter problemalyq bereshekti retteýdiń mindetti rásimin júrgizýi kerek. Eger qaryz alýshy bankke júginse, ol osyndai rásimdi júrgizýge mindetti", - dedi agenttik tóraǵasy.
Osy rásimdi júieli túrde jolǵa qoiý úshin prezidenttiń tapsyrmasymen biyldan bastap barlyq bank, mikroqarjy uiymdary men kollektorlyq agenttikter problemalyq kredittermen jumys isteý týraly jeke josparyn ázirledi.
"Ol jospar aiasynda 1 mln 449 myń adamdy qamtý josparlanyp otyr. Bul jospar mindetti túrde jańartylyp turady. Onyń ishinde bankterdiń kreditti qaita qurylymdaýy, nesieni ishinara nemese tolyq esepten shyǵarý sharalary bar. Mysaly qaryz alýshynyń nesieni tóleýge shamasy joq bolsa, qaryzy qatty kóp bolmasa nemese ol birneshe jyldan beri problemalyq kredit bolsa, bankter sol kreditti ishinara nemese tolyǵymen óz qarajatynan esepten shyǵarady", - dedi Ábilqasymova.
