Halyqtyń áleýmettik jaǵynan osal toptaryna memlekettik qoldaýda júielilik jetispeidi. Bul týraly Kókshetaýda «Halyqtyń áleýmettik osal toptaryna memlekettik qoldaýdyń jetkiliksizdigi» taqyrybynda ótken dóńgelek ústel barysynda aityldy, dep habarlaidy QazAqparat.
Qazaqstannyń kommýnistik halyq partiiasynyń (QKHP) Aqmola oblystyq filialy uiymdastyrǵan sharaǵa qalalyq jumyspen qamtýdy jáne áleýmettik baǵdarlamalardy úilestirý bólimi, eńbekpen qamtý ortalyǵy, úkimettik emes uiymdardyń ókilderi, qala turǵyndary men partiia belsendileri qatysty.
Jiynda Qazaqstannyń kommýnistik halyq partiiasy (QKHP) Aqmola oblystyq filialynyń tóraǵasy Oljas Turǵynov áleýmettiń áljýaz toptaryna kórsetiletin memlekettik kómek áli de kóbeiip, eń birinshi baspana máselesi sheshilýi kerektigin atap ótti.
«Baspana - eń birinshi másele. Búgingi tańda áleýmettiń áljýaz toptaryna páter alý óte qiyn, tipti múmkin emes. Olar azyq-túlikti ázer taýyp otyr. Al baspanaǵa qarjyny qaidan jinaidy?! Jetim balalardyń da jaǵdaiy osyndai. Sondyqtan birinshi kezekte páter alý qoljetimdi bolýy tiis», - dep atap ótti partiianyń oblystyq filialynyń tóraǵasy Oljas Turǵynov.
Sonymen qatar, jiynda Kókshetaý qalalyq jumyspen qamtýdy jáne áleýmettik baǵdarlamalardy úilestirý bóliminiń mamany Erbolat Bilálov, Aqmola oblysy boiynsha isker áielder qaýymdastyǵynyń tóraiymy Dámeli Qoishina, «Azamattyq Alians» zańdy tulǵalar birlestiginiń tóraiymy Irina Terenteva sóz alyp, halyqtyń áleýmettik jaǵynan osal toptaryna memlekettik qoldaýdaǵy túitkildi máselelerdi ortaǵa saldy jáne ony sheshý jolynda qolǵa alynǵan memlekettik baǵdarlamalardyń múmkindikterin túsindirip berdi.
