Profilaktikalyq meditsina akademiiasynyń prezidenti, Amerika densaýlyq saqtaý qaýymdastyǵynyń múshesi Almaz Sharman vaktsinaǵa qarsy toptyń ýájderine jaýap berdi, dep habarlaidy QazAqparat.
«Keibir antivakserler vaktsinalardaǵy qandai da bir ziiandy himiialyq zattardyń bolýyna «alańdaý» qajet degen qaýesetti taratýda. Olardan mundai ýáj estý qiyn, ózderi tek qana organikalyq tamaq jep, Tibettiń aýasymen dem alyp, Alpi sýyn iship júrgen joq. Álemde 100 paiyz qaýipsiz eshteńe joq. Tipti qarapaiym nan gliýtenge qarsy kórsetilimi bar adamdardy aýyr jaǵdaiǵa, keide ólimge ákelýi múmkin. Vaktsinaǵa qarsy adamdar kóp mólsherde qabyldaityn biologiialyq belsendi qospalar men dári-dármekterdiń janama áserleri bolýy múmkin. Sonymen qatar, qazirgi vaktsina óndirisi tazartý dárejesi men óndiristik qaýipsizdiktiń barlyq talaptaryn saqtaý boiynsha joǵary deńgeide», - dep jazdy dáriger Facebook paraqshasynda.
Onyń aitýynsha, vaktsinaǵa narazy toptyń taǵy bir argýmenti – qazirgi vaktsinalaýdy tolyq aiaqtalmaǵan vaktsinalar eksperimentine qaýipti qatysý dep esepteidi.
«Olai bolsa, 120 jyl buryn shyqqan aspirinniń qanǵa áseri týraly klinikalyq zertteýler áli de júrgizilip keledi. Antivakserlerdiń osy pikirine súiensek, planetadaǵy milliardtaǵan adamdar aspirindi synaýda «tájiribelik qoian» bolǵan. Qazirgi ýaqytta COVID-19 – aldyn alýǵa bolatyn aýrý. Vaktsina 100 paiyz bolmasa da, koronavirýs infektsiiasynan jaqsy qorǵaidy jáne aýrýdyń aýyr ótýiniń aldyn alady. Árine, vaktsinanyń ózi kovidti týdyrmaidy. Qazirgi ýaqytta álemde 4 milliard doza túrli vaktsinalar salyndy jáne vaktsinadan týyndaǵan koronavirýs infektsiiasynyń birde-bir jaǵdaiy bolǵan joq. Vaktsina alǵandar is júzinde kovidten qaitys bolmaidy», - deidi A. Sharman.
Sonymen birge, vaktsinalar reprodýktivti buzylýlar men jańa týǵan nárestelerdegi deformatsiialardyń damýyna ákelmeidi.
Kerisinshe, kovidpen aýyratyndarda bedeýlik, belsizdik, shala týý, sondai-aq midyń, júrektiń jáne basqa organdardyń sozylmaly buzylýy, aqyl-oi qabiletiniń tómendeýi qaýpi bar.
«Qazir kún saiyn 7 myńnan astam qazaqstandyq koronavirýs juqtyryp, 150-den astam naýqas qaitys bolýda. Bul – úlken tragediia, eger kóptegen adamdar halyqty adastyrmaǵanda jáne kópshiligimiz qajetti vaktsinalardy ýaqytyly alǵanda, bulai bolmas edi. Ókinishke orai, Qazaqstanda halyqtyń 80 paiyzdan astamy koronavirýsqa qarsy ekpe saldyrǵan joq. Bul onyń taralýy men mýtatsiiasy úshin óte qolaily orta. Mundai jaǵdai áli de jalǵassa, koronavirýstyń juqpaly jáne agressivti nusqalaryna bailanysty indettiń jańa tolqyndaryna tap bolamyz. Jeńildegen karantindik sharalar kezindegi vaktsinalaý protsesi asa juqpaly koronavirýstyń vaktsinaǵa tózimdi jańa nusqalaryn qalyptastyrýǵa yqpal etedi. Sebebi bul virýstyń tabiǵi protsesi. Azamattardyń basym kópshiligi, shamamen 80 paiyzy vaktsina alǵansha karantin sharalaryn álsiretýge bolmaidy», - deidi Almaz Sharman.
