Memleket basshysy Qasym-Jomart Toqaev Májilis otyrysynda «Qazaqstan halqyna» qoǵamdyq álemýettik qoryna turaqty jarna aýdaratyn iri kompaniialar tizimin bekitýdi tapsyrdy, dep habarlaidy QazAqparat.
«Bul Prezidenttiń nemese Úkimettiń nemese basqa memlekettik organnyń qory emes. Bul barlyq qazaqstandyqtardyń qory, halyqtyń qory. Ol ákimshiliktiń nemese Úkimet janynda jumys istemeidi. Bedeldi baqylaý keńesi qurylady, ádil jaýapty basshyny taǵaiyndalady, onyń qyzmetiniń tolyq ashyqtyǵyn, eseptiligin jáne qoǵamnyń baqylaýynda bolýyn qamtamasyz etemiz. Josparlar, biýdjet jáne jobalar saitta jariialanady. Barlyq aqparat ashyq bolady. Qordy qarjylandyrý jeke jáne memlekettik kózderden júzege asyrylady», - dedi Memleket basshysy.
Prezidenttiń aitýynsha, qorǵa halyqaralyq qaiyrymdylyq uiymdarynyń kómegin tartý da josparlanýda.
«Bul qorǵa lotoreialyq qyzmet operatorynyń, stavkalardy esepke alý ortalyǵynyń jáne basqa monopolisterdiń mindetti aýdarymdary túsip otyrady. Árine, biz iri biznes tarapynan aýqymdy jáne turaqty, astyn syzyp aitaiyn, turaqty aýdarymdardy kútemiz.
Tuńǵysh Prezident – Elbasynyń arqasynda elimizde óte tabysty kompaniialar toby jáne tipti halyqaralyq ólshemder boiynsha da óte bai adamdar paida boldy. Endi olardyń Qazaqstan halqyna qurmet kórsetip, oǵan júieli jáne turaqty negizde kómektesetin kezi jetti dep sanaimyn. Sondyqtan Úkimet kompaniialar tobyn anyqtap, qorǵa jyl saiyn aýdarylatyn jarnalar mólsherin bekitýi kerek. Oǵan qosa, úlken qarajatqa ie bolyp, kóleńkede júrgen tulǵalardyń da belsendi qatysýyn kútemin. Bul qor qoǵamdy toptastyrýdyń taǵy bir quralyna ainalyp, azamattarda áleýmettik ádilet sezimin nyǵaita alatynyna senimdimin», - dep túiindedi Q. Toqaev.
Buǵan deiin Prezident «Qazaqstan halqyna» qoǵamdyq áleýmettik qorynda qai sanatqa kómek kórsetiletinin aitqan edi.
