QR Parlamenti Májilisiniń depýtaty, «Aq jol» demokratiialyq partiiasy fraktsiiasynyń jetekshisi Azat Perýashev pandemiia kezinde halyqqa qandai qoldaý kórsetilip jatqanyn baiandady, dep habarlaidy QazAqparat.
«Biz úshin eldegi árbir adamnyń densaýlyǵy asa mańyzdy. Bizdi Qazaqstannyń túrli aimaqtarynda ne bolyp jatqandyǵy alańdatady. Sondyqtan jaǵdaidy baǵalaý úshin Qostanai oblysyndaǵy Arqalyq qalasyna bardyq. Jeke óz kestem boiynsha 10 oblysqa barýdy josparladym. Arqalyqta jergilikti aýrýhanalarǵa baryp, dárigerlermen, koronavirýstan qaitys bolǵandardyń týystarymen sóilesip, dárihanalardy tekserdik. Dárimen qamtamasyz etý boiynsha dárihanalardyń ieleri bizge shaǵymdanyp, «SQ-Farmatsiianyń» dári-dármek tapshylyǵy joq degen sózine narazy bolyp otyr. Biz úsh kúnimizdi jergilikti dárihanalarǵa arnadyq. Barlyq jerde uzyn-sonar kezek jáne kireberiste satylymda joq dárilerdiń tizimi ilingen. Bul dárihanalarda tapshylyqtyń baryn bildiredi. Biraq aýrýhanalarda tapshylyq joq. Sebebi, SQ-Farmatsiia memlekettik aýrýhanalardy dári-dármekpen qamtamasyz etedi. Jergilikti dárihanalar tek qana memlekettik klinikalardy qamtamasyz etýge narazy», - dedi depýtat QR Sybailas jemqorlyqqa qarsy qyzmet uiymdastyrǵan onlain kezdesýde.
Onyń aitýynsha, pandemiia kezinde Arqalyq halqyna qoldaý kórsetý maqsatynda úsh jasandy ókpeni jeldetý apparaty satyp alynyp, 20 muqtaj januiaǵa azyq-túlik berilgen. Depýtat kishigirim eldimekenderdiń kómekke muqtaj ekenin umytpaýdy atap ótti.
«Belsendiler bilik pen laýazymdy tulǵalardyń kómegin kútip otyrǵan joq. Olardyń ózderi azyq-túlik, dári-dármek pen meditsinalyq jabdyqtar satyp alýǵa kómektesip jatyr. Bizdiń azamattyq qoǵam bul máselege mán bere bastady. Dál osyndai úilesý azamattyq qoǵam men memleket arasynda óte qajet. Alaida mundai sharalar tek iri qalalarda ǵana ótedi de, shaǵyn aýyldar umyt qalady. Sondyqtan aýyldar men aýdandardy da qoldaý qajet», - dedi A. Perýashev.
