Halyqaralyq baiqaýlar men pán olimpiadalarynda jeńgen balalarǵa 4 mln teńgege deiin bir retik tólem jasalady. Bul týraly Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Bul zańǵa Prezident qol qoiýy qajet. Prezident qol qoisa, dereý iske asady. Biylǵy jyly halyqaralyq dodalardyń, olmpiadalardyń jeńimpazdary bolsa, osy múmkindikke ie bolady. Iaǵni, bir rettik tólemder 4 million teńgege deiin jetedi, ekinshiden – olardyń tálimgerlerine beriletin qarjy bar, úshinshiden – osy balalarǵa arnaiy granttar berý máselesi qaraldy», - dedi Ashat Aimaǵambetov Senatta tilshilerge bergen suhbatynda.
Ministrdiń aitýynsha, tek qana Olimpiada qatysýshylaryna ǵana emes, túrli shyǵarmashylyq, dúniejúzilik konkýrstardyń jeńimpazdaryna da grant berý máselesi qarastyrylyp otyr.
«Túrli dúniejúzilik deńgeidegi sporttyq jarystardyń jeńimpazdaryna UBT tapsyrmai-aq JOO-ǵa túsý múmkindigin de qarastyrdyq. Bul óte jaqsy másele, óitkeni qarańyzdar, himiiany keremet biletin bala Mendeleev olimpiadasynan jeńispen oraldy, biraq ol UBT-ǵa barǵanda qazaq tilin de, tarihty da, himiiany da bilýi kerek bolady. Sondyqtan bizdiń aityp otyrǵanymyz – osyndai balalardan aiyrylyp qalmaýymyz kerek. Zańǵa túzetýler engizildi, bul 10-20 jyldan beri halyq kóterip júretin máseleniń biri. Sondyqtan bul másele sheshimin tapty», - dedi Aimaǵambetov.
Aita keteiik, Memleket basshysy Qasym-Jomart Toqaev daryndy balalardy qoldaý úshin sharalar ázirleýdi tapsyrdy. Bul mindetti iske asyrý úshin Bilim ministrligi zańnamaǵa túzetýler ázirledi.
Sonymen qatar halyqaralyq olimpiadalardyń altyn medal iegerine – 1500 ailyq eseptik kórsetkish, kúmis medal – 1000 AEK, qola medal iegerine 500 AEK mólsherinde birjolǵy syiaqy tóleý respýblikalyq biýdjet qarajaty esebinen josparlanýda. Sondai-aq, olardy daiyndaǵan pedagogterge birjolǵy syiaqy tólemderi mynadai mólsherde belgilenedi: altyn medal iegerin daiyndaǵan pedagogke – 150 AEK, kúmis medal – 100 AEK, qola medal – 50 AEK.
