Elbasymyzdyń «Bolashaqqa baǵdar: rýhani jańǵyrý» maqalasynyń negizinde bastaý alǵan Qazdaýysty Qazybek bi Keldibekulynyń 350 jyldyq mereitoiyna arnalǵan «Qazdaýysty Qazybek bi jolymen: Babalarǵa taǵzym!» atty halyqaralyq avtokerýeni Ońtústikke kelip jetti, dep habarlaidy "Ult aqparat".
Halyqaralyq mádeni bastama kieli jer Otyrar aýdanynda jalǵasyn tapty. 7 avtokólikpen shyqqan 28 adamnan turatyn avtokerýen músheleri men Qaraǵandy oblysynyń resmi delegatsiiasynyń sapynda, Qazaqstan Respýblikasynyń eńbek sińirgen qairatkeri, «Parasat» ordeniniń iegeri Omarbekova Rymbala, Qazaqstan Respýblikasy Parlament Májilisiniń depýtaty Serik Sápiev, QR Din isteri jáne azamattyq qoǵam ministrliginiń jastar saiasaty departamentiniń direktory Ospanqulov Ǵabidolla, Qaraǵandy oblysynyń jastar saiasaty máseleleri jónindegi basqarma basshysy Quttybai Miras bar. Kelgen qonaqtar aldymen Qazybek babamyz jerlengen, ulttyq panteonǵa ainalǵan Túrkistandaǵy Qoja Ahmet Iasaýi kesenesine arnaiy burylyp, rýhyna quran baǵyshtady.
Igi joba aiasynda oblystyq jastar saiasaty máseleleri jónindegi basqarma basshysy Balmarjan Narbekova bastaǵan kúngeilik kóshbasshy jastar atalǵan resmi delegatsiia ókilderimen kezdesti. Búgingi Ońtústiktegi jastar saiasatynyń júzege asý barysymen tanystyrdy. Memleket basshysy N.Á.Nazarbaevtyń joldaǵan joba-maqalalaryn taldap, jastar ómirine yqpalyn atap ótti. Sondai-aq, óńirdegi máselelerdiń – jastar arasyndaǵy qylmys pen quqyq buzýlyshylyqtyń da anaǵurlym azaiyp, jolǵa qoiylǵanyn marqaia aitty.
Qýanyshty aqpardy qostaǵan Qazaqstan Respýblikasy Parlament Májilisiniń depýtaty Serik Sápiev óz kezeginde aimaqtaǵy jastolqyndy salaýatty ómir saltyna shaqyrdy. Eldiń abyroiy úshin tynymsyz eńbek pen úlken izdenistiń orny mańyzdy ekenin ekshep, Ońtústik jastarynyń qoǵamdaǵy belsendiligine, etken eńbegine tánti ekenin jasyrǵan joq. Jiynnyń sońy Qaraǵandy jáne Ońtústik Qazaqstan oblysynyń jastar saiasaty máseleleri jónindegi qos basqarmanyń arasynda resmi memorandým túzilýimen támamdaldy. Endi jastardyń múddesi úshin qyzmet atqaratyn basqarmalar ózara tájiribe almasyp, jastardyń máselelerin joiýda jumyla jumys jasaidy.
Kerýen aiasynda Qazaqstan Respýblikasynyń din isteri jáne azamattyq qoǵam ministrliginiń jastar saiasaty departamentiniń direktory Ǵabidolla Abdýllauly Ospanqulov oblystyq jastar resýrstyq ortalyǵyna arnaiy kelip, oblystaǵy jastar saiasatynyń júzege asýymen, tynys-tirshiligimen tanysty. Shalǵai aýdan-qalalardaǵy jastolqynnyń jáiin de umyt qaldyrǵan joq, Túrkistan jáne Kentaýdaǵy jastar ortalyǵy mekemelerine arnaiy burylyp, ondaǵy jas mamandarmen kezdesti. Jastardyń bilim men ǵylymdaǵy, mádeniet pen ónerdegi, sporttaǵy jetistikterin kórip, marqaidy. Jazǵy maýsymdaǵy jobalardy saralap, jastar ýaqytynyń tiimdi órbip jatqanyna kóz jetkizdi. Oń baǵasyn berdi.
Ǵabidolla Abdýllauly sóziniń sońyn «Jastardyń bolashaǵy úshin – Memleket basshysy N.Á.Nazarbaevtyń halyqqa joldaǵan joba-baǵdarlamalarynyń orny zor. Búgingi Ońtústik jastarynyń jetistigi, qazirgi kórinisi – Elbasymyzdyń sarabdal saiasatynyń júieli júzege asýy dep bilemin. Jastar saiasaty máseleleri jónindegi basqarmasynyń bastamalarymen tanystym. Únemi izdenis pen jaýapkershiliktiń júgin seziný arqyly atqarylǵan jumystar ekeni kórinip tur. Rasynda, jastar saiasatyn júzege asyrýda kósh bastaýshy Ońtústik óńiri ózge de oblystarǵa úlgi bola alatyny qýantady. Osyndai ózara tájiribe almasý, igi jobalar arqyly Elimizdegi jastardyń ómiri jaqsaryp, keleshegi jarqyn bolatynyna senim mol!», – dep qorytyndylady. Aita ótetin aqparat, búginde bir ǵana Ońtústik óńirinde 748 myńnan astam jas bar.
