Ministrliktiń basty missiiasy – saýda diplomatiiasyn qoldana otyryp, otandyq biznestiń ulttyq múddelerin qorǵaý. Bul týraly Saýda jáne integratsiia ministri Baqyt Sultanov aitty, dep habarlaidy QazAqparat.
«Saýda jaǵynan jolǵa qoiylyp jatqan yntymaqtastyqqa qaramastan halyqaralyq saýdada memleketter protektsionizm saiasatyna basymdyq berip, ártúrli dárejedegi shekteý sharalaryn engizýge beiim. Bul baǵytta bizdiń ministrliktiń basty missiiasy – saýda diplomatiiasyn qoldana otyryp, otandyq biznestiń ulttyq múddelerin qorǵaý. Búgingi tańda naqty keister barshylyq. Máselen, reseilik naryqqa azyq-túlikti tasymaldaýda kedergiler joiyldy («Zenchenko i K» JShS, «J.F.M. Company» JShS jáne «Aisberg PV» JShS ónimderin tasymaldaýǵa qoiylǵan shekteýdi alyp tastaý). Sol sekildi qazaqstandyq kómirdi Ýkrainaǵa jetkizýde kedergiler eńserilip, eksport kólemin 40 paiyzǵa arttyrýǵa múmkindik týdy», - dedi Baqyt Sultanov atalǵan ministrliktiń keńeitilgen otyrysynda.
Sonymen qatar, Saýda jáne integratsiia ministrligi memlekettik organdarmen birlesken jumysty kúsheitip, osynyń arqasynda AQSh qazaqstandyq ýrandy jetkizýge qoiylǵan kvotany alyp tastaǵan.
«Eki jyldyq talqylaýdan keiin EAEO aýmaǵy boiynsha kedendik poshlina somasyn bólýdiń normativti mólsheri boiynsha mámilege keldik. Iaǵni, halyqaralyq arenada Qazaqstannyń múddesin qorǵaý jumysy jalǵasyn tabady», - dedi ol.
