Búgin, iaǵni, 2 qarasha kúni «Alataý» dástúrli óner teatrynda 5-25 jas aralyǵyndaǵy ónerpaz jastar arasynda I Halyqaralyq "AMANAT music" respýblikalyq konkýrs-festivali bastaldy. Atalǵan shara "Amanat" óner ortalyǵynyń qurylǵanyna 1 jyl tolýyna orai uiymdastyrylyp otyr.
I Halyqaralyq "AMANAT music" atty konkýrs-festivaldiń maqsaty – halqymyzdyń dástúrli ónerin damytý, jas ónerpazdarymyzdyń ónerdegi juldyzyn jaǵý, rýhani keńistikke jol ashý.
Halqymyzdyń babadan kele jatqan ulttyq ónerin damytý úshin ótken jyly Almaty qalasynyń ákimi Baýyrjan Baibektiń qoldaýymen «Alataý» dástúrli óner teatry qurylǵan bolatyn. Osy teatrdyń irgetasy qalanýymen birge ulttyq ónerdi jas urpaq boiyna sińirý, olardy dástúrli ónerge baýlý maqsatynda Sáýle Janpeiisovanyń jetekshiligimen «Amanat» óner ortalyǵy ashylǵan edi.
Osy festival aiasynda 2 qarasha kúni, saǵat 19.00-de «Alataýdy jańǵyrtty dombyra men qomýzym» atty Qazaqstan jáne Qyrǵyzstan dástúrli óner sheberleriniń kontserti ótedi. Bul tamyry tereńnen tartqan eki el arasyndaǵy dostyq qarym-qatynasty nyǵaitý men qazaq-qyrǵyz ónerin nasihattaý maqsatyndaǵy buryn-sońdy bolmaǵan joba. Kontsert barysynda eki el ónerpazdary arasynda aqyndar aitysy, án aitys, kúi tartys jáne bi jarysy bolady.
4 qarasha kúni saǵat 16.00-de ótetin Gala-kontsertte konkýrs jeńimpazdary jáne «Amanat» óner ortalyǵynyń oqytýshylary Elza Qarabalina, Esbol Shańbaev, Asylai Ápenova, Azamat Shnarov, Gúlmira Izbasqanova, sonymen birge Qazaqstannyń óner sheberleri Sáýle Janpeiisova, Núrken Áshirov, Ómirqul Ainiiazov, sondai-aq shet memleketterden qatysatyn I Halyqaralyq «AMANAT musis» konkýrs-festivaliniń ádil qazylar alqasynyń músheleri Iýliiana Krivoshapkina (Resei, Iakýtiia) men Qairat Salmakeev (Qyrǵyzstan) t.b. óner kórsetedi.
