Foto: © iStock
Batys Qazaqstan oblysynyń ákimi Nariman Tóreǵaliev óńirde kiik etine suranys tómen ekenin málimdedi, dep habarlaidy Sputnik Qazaqstan.
Onyń aitýynsha, búginde 10 myńnan astam kiik aýlanǵan. 17 brigada jumys istep jatyr. Onyń 15-i atý ádisimen, ekeýi aýlaý ádisimen isteidi.
"Ohotzooprom" operator bolyp taǵaiyndaldy. Osy mekeme kiik múiizderin sol jerde akti jasap, nómirlep, tańbalap, sanap alady. Sosyn ony arnaiy saqtaýǵa qoiady. Sebebi kiik múiizin satýǵa ruqsat joq ekenin bilesizder. Qazirgi tańda 11 myńǵa jýyq kiik múiizin kesip aldyq", -dedi Tóreǵaliev ortalyq kommýnikatsiialar qyzmetinde ótken baspasóz máslihatynda.
Sondai-aq ol kiik etin óńdeitin 8 et kombinaty jumys isteitinin atap ótti. Beseýi – BQO, qalǵandary – Aqtóbe men Atyraý oblystarynan.
"Osy kombinattarǵa kiik eti kelisine 315 teńgeden jetkiziledi. Al et kombinattary ári qarai 1200 teńge ainalasynda satyp jatyr", - dep málimdedi óńir basshysy.
Tóreǵaliev kiik eti satyla bastaǵannan keiin mal etine suranys bolmai qalmai ma degen suraqqa da jaýap berdi.
"Kiiktiń etin kez kelgen adam almaidy. Ony, ásirese, jastardyń kóbi bilmeidi. Keńes ókimeti kezinde kiik etin jep qalǵan adamdar bolmasa, kóbi, jasyratyny joq, kiiktiń etin jep jatqan joq. Bylaisha aitqanda, asa qatty qyzyǵýshylyq, suranys bar dep aita almaimyn. Sebebi, ózderińiz kórip otyrsyzdar, baǵasynyń ózi 1200 teńge", - deidi oblys ákimi.
Onyń aitýynsha, Qaraǵandy oblysynda bir kásipker kiikterdi arnaiy baǵyp, jemdep, qolǵa úiretý ádisin pilottyq rejimde iske qosqan.
"Ol maǵan osyndai jolmen kiik sanyn retteýge bolatyny týraly óz usynysyn aitty. Biz qazir atý, aýlaý ádisinen bólek, jańaǵydai ádisterdi de qolǵa almaqshymyz", - dep atap ótti Tóreǵaliev.
Aitýynsha, biylǵy jyldyń qorytyndysy boiynsha kiikter sany 1 mln 300 myńnan asady. Ǵalymdardyń paiymynsha, bir kiikke 15 gektar jer kerek.
"Iaǵni bir mln kiikke 15 mln gektar jer kerek. Bizde ózi 15 mln gektar jer bolatyn bolsa, onyń bárin kiikterge berip qoisaq... Óńirde bir millionnyń ústinde iri qara, eki millionnan astam qoi-eshki, 350 myńnyń ústinde jylqy bar. Olardyń bárine jem-shóp, azyq kerek. Sondyqtan da kiikterge qatysty sharýa qojalyqtary aiqailap aityp júrgen másele qazir rettelip jatyr. Ekologiia men aýyl sharýashylyǵy ministrlikteri tarapynan kiik sanyn retteýge bailanysty normativtik quqyqtyq aktiler qabyldandy", - dep atap ótti Tóreǵaliev.
