Halyq tabysynyń satyp alý qabiletin qorǵaýǵa erekshe mán beriledi. Bul týraly Úkimet otyrysynda QR Ulttyq ekonomika ministri Álibek Qýantyrov aitty, dep habarlaidy QazAqparat.
Onyń atap ótýinshe, Halyqtyń tabysyn arttyrý baǵdarlamasyn iske asyrý aiasynda tabystyń satyp alý qabiletin qorǵaýǵa erekshe mán beriledi.
«Osy baǵytta mynadai is-sharalar iske asyrylatyn bolady: ÁMAT tizbesine enbegen azyq-túlik taýarlarynyń óndirisin ulǵaitý; ishki naryqtyń importyn negizgi azyq-túlik emes taýarlarmen almastyrý boiynsha is-sharalardy iske asyrý; halyqtyń problemaly qaryzdarymen jumys isteý boiynsha bankterdiń jeke josparlaryn qabyldaý», - dedi Álibek Qýantyrov.
Ministrdiń aitýynsha, atalǵan is-sharalardy iske asyrý nátijesinde 2025 jylǵa qarai JIÓ-degi eńbekaqynyń úlesi – 34,5%; jalpy tabystaǵy eńbek qyzmetinen túsken tabystar úlesi – 76,2%; tabysy eń tómen kúnkóris deńgeiinen az halyqtyń úlesi – 5,2%; jumyssyzdyq deńgeii 4,7% bolady. Búkil kezeń ishinde barlyǵy 2 mln astam adamǵa jumys orny qurylady.
Ministrdiń aitýynsha, shaǵyn jáne orta biznesti damytýdy yntalandyrý kásipkerlerdi qoldaýdyń óńirlik baǵdarlamasy aiasynda kreditter/mikronesieler boiynsha jergilikti biýdjetterden sýbsidiialar berý, mono-, shaǵyn qalalar men aýyldyq eldi mekenderde jeńildikpen mikrokredit berýdi jáne jańa kepildik berý quralyn engizý arqyly júzege asyrylatyn bolady.
